1 августдан жарима майдончасидан машиналар фақат QR-код орқали чиқарилади

Янги тартибга кўра, транспорт воситасини чиқариш учун рухсатнома фақат «Жарима майдончаси» ахборот тизими орқали махсус QR-код кўринишида тақдим этилади.

Маълум қилинишича, Ички ишлар вазирлиги Солиқ қўмитаси ҳамда Рақамли технологиялар вазирлиги билан ҳамкорликда икки ой муддат ичида ушбу тизимни солиқ органларининг ахборот тизимлари билан тўлиқ интеграция қилади.

Интеграция натижасида жарима майдончасига жойлаштирилган транспорт воситалари ҳақидаги муҳим маълумотлар солиқ тизимида автоматик тарзда шакллантирилади.

Жумладан, қуйидаги маълумотлар электрон базада акс этади:

• транспорт воситасининг маркаси ва давлат рақами;
• майдончага киритилган ва ундан чиқарилган аниқ вақт;
• кўрсатилган хизматлар учун ундирилган тўловлар миқдори.

Шунингдек, янги ахборот платформасига жарима майдончалари эгаларининг реквизитлари ҳам мажбурий тартибда киритилади.