Тошкентда автомобилларни эвакуация қилиш тартиби ўзгардими?

 Уни узоқ вақт олиб кетмаган автомобил эгалари эса қўшимча молиявий мажбуриятларга дуч келиши мумкин.

24 декабрдан Тошкентда автомобилларни мажбурий эвакуация қилиш ва жарима майдончаларида сақлаш бўйича янги механизм ишга тушади. Ўзгаришлар Вазирлар Маҳкамасининг 508-сон қарори билан белгиланган.

Тошкент шаҳрида Йўл ҳаракатини ташкил этиш маркази маълум қилишича, янги тизим автомобилни эвакуаторга юклаш, ташиш, жарима майдончасида сақлаш ва эгасига қайтариш жараёнларини электрон шаклда назорат қилиш имконини беради.

Янги тартибга кўра, пиёдалар йўлаклари, ногиронлиги бўлган шахслар учун ажратилган жойлар ҳамда махсус хизматлар ҳаракатига тўсқинлик қиладиган ҳудудларда қолдирилган автомобиллар эвакуация қилинади.

Ҳайдовчи эвакуатор автомобилни юклашни бошлашидан олдин етиб келиб, қоидабузарликни бартараф этса, транспорт воситаси олиб кетилмайди. Аммо юклаш жараёни бошланганидан кейин эвакуацияни тўхтатиш мумкин эмас.

Эвакуация ва сақлаш қанча туради?

Янги қоидаларда эвакуациянинг ҳар бир километри ва жарима майдончасида сақлашнинг ҳар бир суткаси учун 88 минг сўмгача тўлов белгиланган.

Сақлаш учун ҳақ автомобил эвакуаторга юкланган вақтдан бошлаб ҳисобланади. Эвакуация хизматлари учун умумий тўлов 1 миллион 760 минг сўмдан ошмаслиги керак. Бу суммага йўл ҳаракати қоидаларини бузганлик учун белгиланадиган жарима кирмайди.

Масалан, автомобилни 3 километр масофага ташиш ва жарима майдончасида 3 сутка сақлаш учун жами 528 минг сўмгача тўлов талаб этилади. Бунга қоидабузарлик жаримаси ҳам қўшилади.

Машинани жарима майдончасидан қандай олиш мумкин?

Транспорт воситасини қайтариб олиш учун электрон тўловни амалга ошириш, бир иш куни ичида SMS орқали QR-кодли рухсатнома олиш ва шу ҳужжат асосида автомобилни олиб чиқиш лозим.

Электрон тизимда рухсатнома расмийлаштирилмаган бўлса, автомобилни эгасига ёки бошқа шахсга беришга йўл қўйилмайди.

Агар транспорт воситаси асоссиз равишда эвакуация қилинган бўлса, юзага келган харажатлар тегишли давлат органи томонидан қопланади. Ташиш вақтида автомобилга зарар етказилса, бунинг учун жарима майдончаси оператори жавоб беради.

Автомобилни узоқ вақт олиб кетмаслик оқибати қандай бўлади?

Янги тартибда талаб қилиб олинмаган автомобиллар учун ҳам алоҳида чоралар назарда тутилган.

Агар транспорт воситаси 6 ой давомида жарима майдончасидан олиб кетилмаса, у талаб қилиб олинмаган транспорт воситалари реестрига киритилади. Шу вақтгача йиғилган қарздорлик мажбурий тартибда ундирилади.

12 ой ўтганидан кейин эса суд автомобилни эгасиз мол-мулк деб топиши мумкин.

Пойтахтда бундай чораларнинг жорий этилиши нотўғри тўхташ ва тўхтаб туриш ҳолатларига қарши курашни кучайтиришга қаратилган. Йўл ҳаракатини ташкил этиш маркази аввалроқ ҳам пиёдалар йўлаклари, бекатлар, яшил ҳудудлар ва тўхташ тақиқланган жойларда қолдирилган автомобилларни эвакуация қилиш чоралари кучайтирилишини билдирган эди.