Архангельскда ўзбекистонлик ишчи ҳалок бўлди

Ишчи бинога ташқи томондан қурилиш асбобларини 5-қаватдан 6-қаватга кўтариш жараёнида мувозанатни йўқотиб, 5-қават баландлигидан бетон плитасига қулаб тушган.

Тиббий ёрдам кўрсатиш учун чақирилган тез ёрдам бригадаси реанимация чораларини кўрган, аммо бу натижа бермаган — ишчи воқеа жойида ҳалок бўлган.

Бу охирги икки ҳафта ичида Архангельск вилоятида қурилиш объектларида содир бўлган учинчи ўлим ҳолати.

Аввалроқ Северодвинскда кран ҳайдовчиси ҳалок бўлган, яна уч ишчи турли даражада тан жароҳати олган эди.

“Давлат меҳнат инспектори ҳуқуқни муҳофаза қилувчи органлар билан бирга воқеа жойига чиқди. Ҳозирда воқеа сабабларини аниқлаш ва баҳолаш учун тегишли материаллар тўпланмоқда”, деди Архангельск вилояти ва Ненец автоном округи бўйича Давлат меҳнат инспекцияси раҳбарининг ўринбосари Александр Назаров.