Давлат ажратган моддий ёрдам пулларининг 75 фоизи ишлатилмай қолган

 Депутат Сайёра Имомованинг маълум қилишича, Камбағалликни қисқартириш давлат мақсадли жамғармасига ажратилган 485,6 миллиард сўмнинг атиги 63,9 фоизи ўзлаштирилган.

Шунингдек, Бандликка кўмаклашиш давлат мақсадли жамғармасидан ишсизлик нафақаси ва моддий ёрдам учун ажратилган маблағларнинг 75 фоизи, яъни 48,6 миллиард сўм ишлатилмай қолган.

Субсидияларнинг ҳам катта қисми ўзлаштирилмаган

Йиғилишда яна бир муҳим масалага эътибор қаратилди. Ҳоким ёрдамчилари тавсияси асосида 40 минг нафар хотин-қизга субсидия ажратиш режалаштирилган бўлса-да, уларнинг атиги 7 минг нафари ушбу имкониятдан фойдаланган.

Натижада 33 минг нафар хотин-қизни тадбиркорликка жалб қилиш ва қўллаб-қувватлаш ишлари амалга ошмаган.

Вазирлик буни нима билан изоҳлади?

Бандлик вазири ўринбосари Алишер Муродов субсидиялар режасининг бажарилмаганини тўлов механизми ўзгаргани билан изоҳлади.

Унинг айтишича, талаб паст ёки самараси кам бўлган 14 турдаги субсидия бекор қилиниб, улар ўрнига камбағал оилаларни тадбиркорликка жалб қилиш учун фоизсиз ссудалар ва бошқа молиявий қўллаб-қувватлаш механизмлари жорий этилган.

Назорат кучайтирилади

Бош вазир ўринбосари, иқтисодиёт ва молия вазири Жамшид Қўчқоров жорий йилда мазкур камчиликларни бартараф этиш бўйича ишлар кучайтирилишини билдирди.

Унинг таъкидлашича, айниқса ҳоким ёрдамчилари тавсияси билан хотин-қизларга ажратиладиган субсидияларнинг манзилли ва самарали ишлатилиши устидан алоҳида назорат ўрнатилади ҳамда ярим йиллик ҳисоботда яхшироқ натижалар тақдим этиш режалаштирилган.