Ипотека тўлаётганлар учун солиқ имтиёзи автоматик тартибда берилиши режалаштирилмоқда

Янги тартибга кўра, фуқаролар солиқ имтиёзини олиш учун алоҳида ариза топшириши ёки ҳужжатлар йиғиши талаб этилмайди.

Солиқ қўмитаси ипотека кредити, асосий қарз ва фоиз тўловлари, субсидия, уй-жойга мулк ҳуқуқи, иш ҳақи ҳамда бошқа зарур маълумотларни вазирлик ва идораларнинг ахборот тизимларидан электрон шаклда қабул қилади.

Маълумотлар автоматик таққослангач, фуқаронинг солиқ имтиёзига ҳақлилиги аниқланади ва декларация электрон шаклда тайёрланади.

Фуқаро ҳисобланган имтиёз ҳақида шахсий кабинет, «Солиқ» мобил иловаси, SMS ёки электрон почта орқали хабардор қилинади. Агар 5 кун ичида эътироз ёки тузатиш киритилмаса, декларация тасдиқланган деб ҳисобланади.

Лойиҳада яна қуйидаги янгиликлар назарда тутилган:

• ёш оилалар учун ипотека бўйича солиқ имтиёзи субсидия олинган-олинмаганидан қатъи назар қўлланади;
• 2026 йил 1 сентябргача тижорат банклари ипотека ва субсидияга оид маълумотларни Солиқ қўмитасига реал вақт режимида электрон тарзда узатади;
• 2026 йил 1 ноябргача янги хизмат Электрон солиқ хизматлари портали, «Солиқ» мобил иловаси ва my.gov.uz орқали ишга туширилиши режалаштирилган.

Шунингдек, ипотека ҳисобига сотиб олинган ёки қурилган уй-жой мулк ҳуқуқи давлат рўйхатидан ўтганидан кейин 36 ой ичида бошқа шахсга ўтказилса, берилган солиқ имтиёзи бекор қилиниб, аввал қўлланган имтиёзлар қайта ҳисобланади.