Ногиронлиги бўлган абитуриентларга имтиҳонда 50 фоиз қўшимча вақт берилади

Ҳужжатга кўра, 2027/2028 ўқув йилидан ногиронлиги бўлган абитуриентларга олий таълим ташкилотларига кириш имтиҳонларида, шунингдек, ногиронлиги бўлган педагогларни аттестациядан ўтказиш ва миллий сертификат олиш имтиҳонларида белгиланган вақт меъёрига нисбатан 50 фоиз қўшимча вақт берилади.

Шунингдек, имтиҳон жараёнларида Брайл алифбоси, аудио ва электрон форматдаги имтиҳон материалларидан фойдаланиш имконияти яратилади.

Қарорга мувофиқ, 2027 йил 1 майдан алоҳида таълимга эҳтиёжи бўлган болаларни ваучер асосида замонавий ассистив (ёрдамчи) жиҳозлар билан таъминлаш тизими жорий этилади.

Бундан ташқари, 2026/2027 ўқув йилидан ихтисослаштирилган давлат таълим муассасаларида ўқитиш боланинг индивидуал таълим эҳтиёжи, функционал имкониятлари ва ўзлаштириш даражасидан келиб чиққан ҳолда ишлаб чиқиладиган индивидуал таълим режалари асосида ташкил этилади.

Қарор билан 2026 йил 1 сентябрдан коррекцион синфлар ташкил этган нодавлат умумий ўрта таълим муассасаларини давлат томонидан молиявий қўллаб-қувватлаш механизми ҳам жорий этилмоқда.

Унга кўра, ҳар бир ўқувчи учун:

• Тошкент шаҳрида — БҲМнинг 11 баравари;
• вилоят марказлари ва Нукус шаҳрида — БҲМнинг 9,5 баравари;
• бошқа туман ва шаҳарларда — БҲМнинг 8,5 баравари миқдорида субсидия ажратилади.