Истанбулда икки ўзбекистонлик аёл ўлдирилиб, жасадлари бўлакланган

24 январь куни Истанбулнинг Шишли туманидаги чиқинди контейнеридан 37 ёшли Дурдона Ҳакимованинг чойшабга ўралган, қисмларга бўлинган жасади топилган эди. Ҳолат юзасидан икки нафар Ўзбекистон фуқароси Истанбул аэропортида мамлакатни тарк этиб, Грузияга учиб кетмоқчи бўлган вақтида қўлга олинган.

Тергов давомида Умрание туманида содир этилган қотиллик иши бўйича қўшимча тафсилотлар аниқланди. Маълум бўлишича, ўша манзилда яна бир аёл — 32 ёшли Сайёра Эргашева ҳам ўлдирилган бўлиши мумкин.

Турк ОАВ маълумотларига кўра, Эргашева 2025 йил 28 декабрь куни Туркияга кириб келган ва сўнгги бор Ҳакимова ўлдирилган уйда кўринган. 23 январдан буён у билан алоқа узилган.

Истанбул полицияси томонидан кузатув камералари ёзувлари қайта кўриб чиқилган. 24 январга оид тасвирларда гумонланувчилар уйдан бир нечта қора пакет ва катта чемодан олиб чиқиб кетаётгани қайд этилган. Терговчиларга кўра, жасадлар қисмларга ажратилиб, шаҳарнинг Фотиҳ туманидаги турли чиқинди контейнерларига ташланган бўлиши мумкин.

Дастлаб гумонланувчилар жиноятда фақат ёрдам берганини билдирган. Бироқ иккинчи қотиллик ҳолати аниқлангач, уларга нисбатан “қасддан одам ўлдириш” моддаси бўйича процессуал чоралар кучайтирилган.

Мазкур воқеа жамоатчилик ўртасида катта резонанс уйғотди. Истанбулнинг Шишли туманидаги “Османбей” метро бекати яқинида мингдан ортиқ киши тўпланиб, марҳума жасади топилган жой томон юриш қилган. Намойиш иштирокчилари “Эркаклар зўравонлигини тўхтатинг”, “Ўлдирилган аёллар учун адолат талаб қиламиз” ва “Мигрант аёллар ёлғиз эмас” деган шиорлар билан чиқиш қилган.

Анқарада ҳам юзлаб одамлар “Аёллар қотиллигини тўхтатайлик” чақириқлари билан норозилик намойишлари ўтказиб, айбдорларга нисбатан қатъий жазо чоралари қўллашни талаб қилган.