Istanbulda ikki oʻzbekistonlik ayol oʻldirilib, jasadlari boʻlaklangan

24 yanvar kuni Istanbulning Shishli tumanidagi chiqindi konteyneridan 37 yoshli Durdona Hakimovaning choyshabga oʻralgan, qismlarga boʻlingan jasadi topilgan edi. Holat yuzasidan ikki nafar Oʻzbekiston fuqarosi Istanbul aeroportida mamlakatni tark etib, Gruziyaga uchib ketmoqchi boʻlgan vaqtida qoʻlga olingan.

Tergov davomida Umraniye tumanida sodir etilgan qotillik ishi boʻyicha qoʻshimcha tafsilotlar aniqlandi. Maʼlum boʻlishicha, oʻsha manzilda yana bir ayol — 32 yoshli Sayyora Ergasheva ham oʻldirilgan boʻlishi mumkin.

Turk OAV maʼlumotlariga koʻra, Ergasheva 2025 yil 28 dekabr kuni Turkiyaga kirib kelgan va soʻnggi bor Hakimova oʻldirilgan uyda koʻringan. 23 yanvardan buyon u bilan aloqa uzilgan.

Istanbul politsiyasi tomonidan kuzatuv kameralari yozuvlari qayta koʻrib chiqilgan. 24 yanvarga oid tasvirlarda gumonlanuvchilar uydan bir nechta qora paket va katta chemodan olib chiqib ketayotgani qayd etilgan. Tergovchilarga koʻra, jasadlar qismlarga ajratilib, shaharning Fotih tumanidagi turli chiqindi konteynerlariga tashlangan boʻlishi mumkin.

Dastlab gumonlanuvchilar jinoyatda faqat yordam berganini bildirgan. Biroq ikkinchi qotillik holati aniqlangach, ularga nisbatan “qasddan odam oʻldirish” moddasi boʻyicha protsessual choralar kuchaytirilgan.

Mazkur voqea jamoatchilik oʻrtasida katta rezonans uygʻotdi. Istanbulning Shishli tumanidagi “Osmanbey” metro bekati yaqinida mingdan ortiq kishi toʻplanib, marhuma jasadi topilgan joy tomon yurish qilgan. Namoyish ishtirokchilari “Erkaklar zoʻravonligini toʻxtating”, “Oʻldirilgan ayollar uchun adolat talab qilamiz” va “Migrant ayollar yolgʻiz emas” degan shiorlar bilan chiqish qilgan.

Anqarada ham yuzlab odamlar “Ayollar qotilligini toʻxtataylik” chaqiriqlari bilan norozilik namoyishlari oʻtkazib, aybdorlarga nisbatan qatʼiy jazo choralari qoʻllashni talab qilgan.