Лицензиясиз “Умра” зиёратига юборишни ваъда қилган икки шахс ушланди

Тошкент вилоятининг Тошкент туманида 1984 йилда туғилган, тегишли лицензияга эга бўлмаган шахс пойтахтлик фуқаронинг ишончига кириб, танишлари орқали уни “Умра” зиёратига юборишни ваъда қилган. Бунинг эвазига у 1100 АҚШ доллари талаб қилган.

Мазкур шахс 1000 АҚШ доллари ва 1,2 миллион сўмни олаётган вақтда Давлат хавфсизлик хизмати, Иқтисодий жиноятларга қарши курашиш департаменти ҳамда Ички ишлар вазирлиги ходимлари томонидан ашёвий далиллар билан ушланган.

Шу каби ҳолат Фарғона вилоятининг Данғара туманида ҳам аниқланган. Бу ерда фаолият юритувчи туризм компанияси менежери икки нафар Учкўприк тумани фуқаросини “Умра” сафарига юборишни ваъда қилган. У бунинг эвазига 2200 АҚШ доллари олган вақтда ДХХ ва ички ишлар органлари ходимлари томонидан ушланган.

Ҳозирда ҳар икки ҳолат бўйича жиноят ишлари қўзғатилиб, тергов ҳаракатлари олиб борилмоқда.

Муаллиф: Ҳасанбой ОЧУН