Оққўрғон тумани прокурори ёрдамчиси 12 минг доллар талаб қилиб, 4700 доллар олаётганда ушланди

Тошкент вилоятининг Оққўрғон тумани прокуратураси прокурори ёрдамчиси фуқарога 600 миллион сўм миқдорида имтиёзли кредит олиб бериш ва автомобиль олди-сотдиси масаласини ҳал қилиш эвазига 12 минг доллар талаб қилган. У талаб қилинган пулнинг 4700 долларини олаётган вақтда ушланган.

Бу ҳақда Давлат хавфсизлик хизмати хабар берди.

Қайд этилишича, ДХХ ходимлари Бош прокуратуранинг Шахсий хавфсизлик бошқармаси билан ҳамкорликда коррупцияга қарши курашиш йўналишида тезкор тадбир ўтказган.

Тадбир давомида прокурор ёрдамчиси талаб қилинган 12 минг доллардан 4700 долларини олган вақтда ашёвий далиллар билан қўлга олинган.

Терговга қадар текширув жараёнида у бундан аввал ҳам мазкур фуқародан 1300 доллар олгани аниқланган.
Ҳозирда ҳолат юзасидан прокурор ёрдамчисига нисбатан жиноят иши қўзғатиш чораси кўрилмоқда.

Айбдорлик масаласи суднинг қонуний кучга кирган ҳукми билан ҳал этилади.

Муаллиф: Ҳасанбой ОЧУН