Мубашшир Аҳмад «Сангород»га ўтказилди

Бу ҳақда унинг адвокати Абдуллоҳ Содиқ маълум қилди.

Адвокатнинг билдиришича, маҳкум Навоий вилояти Қизилтепа туманидаги 5-сонли жазони ижро этиш колониясидан пойтахтдаги Яшнобод туманида жойлашган 23-сонли маҳкумлар учун ихтисослашган касалхонага («Сангород») вақтинчалик кўчирилган. Мазкур тиббий муассасада оғир касалликка чалинган ёки даволанишга муҳтож маҳкумлар сақланади.

Маълум қилинишича, унга «чап оёқ артрози» ва «қандли диабет» ташхислари қўйилган. Кейинги пайтларда оёқларида яна шиш пайдо бўлгани сабабли уни тўлиқ ва чуқурлаштирилган тиббий кўрикдан ўтказишга қарор қилинган. Тиббий текширувлар камида икки ҳафта давом этиши кутилмоқда.

Адвокатнинг расмийларга таяниб билдиришича, келаси ҳафтадан бошлаб анализлар олиш ва комплекс кўрик жараёни бошланади. Ҳозирча ҳимоячи ва маҳкумнинг яқинлари у билан учрашмаган.

Эслатиб ўтамиз, 2025 йил октябр ойида Алишер Турсунов 2,5 йил муддатга озодликдан маҳрум этилган эди. Аввалроқ адвокат унинг соғлиғи оғир экани ва шу ҳолатда ишга жалб этилаётганини маълум қилган. Омбудсман эса ўрганиш натижасига кўра маҳкум соғлиғи ёки меҳнат шароити юзасидан шикоят билдирмаганини хабар қилган эди.