Mubashshir Ahmad «Sangorod»ga oʻtkazildi

Bu haqda uning advokati Abdulloh Sodiq maʼlum qildi.

Advokatning bildirishicha, mahkum Navoiy viloyati Qiziltepa tumanidagi 5-sonli jazoni ijro etish koloniyasidan poytaxtdagi Yashnobod tumanida joylashgan 23-sonli mahkumlar uchun ixtisoslashgan kasalxonaga («Sangorod») vaqtinchalik koʻchirilgan. Mazkur tibbiy muassasada ogʻir kasallikka chalingan yoki davolanishga muhtoj mahkumlar saqlanadi.

Maʼlum qilinishicha, unga «chap oyoq artrozi» va «qandli diabet» tashxislari qoʻyilgan. Keyingi paytlarda oyoqlarida yana shish paydo boʻlgani sababli uni toʻliq va chuqurlashtirilgan tibbiy koʻrikdan oʻtkazishga qaror qilingan. Tibbiy tekshiruvlar kamida ikki hafta davom etishi kutilmoqda.

Advokatning rasmiylarga tayanib bildirishicha, kelasi haftadan boshlab analizlar olish va kompleks koʻrik jarayoni boshlanadi. Hozircha himoyachi va mahkumning yaqinlari u bilan uchrashmagan.

Eslatib oʻtamiz, 2025 yil oktabr oyida Alisher Tursunov 2,5 yil muddatga ozodlikdan mahrum etilgan edi. Avvalroq advokat uning sogʻligʻi ogʻir ekani va shu holatda ishga jalb etilayotganini maʼlum qilgan. Ombudsman esa oʻrganish natijasiga koʻra mahkum sogʻligʻi yoki mehnat sharoiti yuzasidan shikoyat bildirmaganini xabar qilgan edi.