Ўқитувчилар учун янги имтиёзлар

Жумладан, миллий сертификатга эга ўқитувчиларнинг ойлик маошига 50 фоиз устама тўланади. Ҳар йили 208 та туман ва шаҳардаги лидер ўқитувчиларнинг ҳар бирига 30 млн сўмдан мукофот берилади.

Шунингдек, ҳар йили 1 минг нафар ўқитувчи Буюк Британия, Франция ва Сингапур каби давлатларга малака ошириш ва стажировкага юборилади.

Камида 15 йиллик иш стажига эга педагогларнинг фарзандларига олий таълим муассасаларида ўқиш учун контракт тўловини амалга оширишга фоизсиз таълим кредити ажратилади.

Сертификат ва олимпиада натижалари учун қўшимча рағбат

Хорижий ва миллий сертификат олиш учун педагоглар қилган имтиҳон харажатлари тўлиқ қоплаб берилади.

Хоразмий, Фарғоний, Беруний, Ибн Сино, Менделеев каби халқаро ва минтақавий олимпиадалар ғолибларини тайёрлаган педагогларга тўғридан-тўғри олий малака тоифаси берилади.

Бошланғич синф ўқувчилари учун ҳам фан олимпиадалари йўлга қўйилади. Келаси йилдан 4-синфлар ўртасидаги олимпиаданинг туман босқичи ғолиблари компьютер билан тақдирланади.

Уларни тайёрлаган ўқитувчиларга натижага қараб:

• туман босқичида — 10 млн сўм;
• вилоят босқичида — 50 млн сўм;
• республика босқичида — 100 млн сўм

миқдорида мукофот берилади.

100 та мактабда айрим фанлар инглиз тилида ўқитилади

Янги ўқув йилидан бошлаб 100 та мактабнинг биттадан синфида математика, информатика ва табиий фанларни тўлиқ инглиз тилида ўқитиш йўлга қўйилади.

Лойиҳага жалб этилган ўқитувчилар ҳамда мактабга тайёрлов гуруҳи педагогларининг ойлик маошига 100 фоиз устама тўланади.

Мактабларда сифат индекси жорий этилади

Ўрта таълим тизимида янги сифат индекси жорий этилади. Унга кўра, мактаблар педагогик жамоанинг салоҳияти ва эришган натижалари асосида тоифаларга ажратилади.

Илғор мактаблар ўз тажрибасини бошқа таълим муассасаларида жорий этиб, уларнинг юқори тоифага ўтишига ёрдам берса, бутун педагогик жамоага 30 фоиз устама тўланади.

Бунда мактабларда меҳнатга ҳақ тўлаш тизимида ҳам сифат кўрсаткичлари ҳисобга олинади.

Бир ойлик мажбурий малака ошириш тартиби бекор қилинади

Педагогларнинг малака ошириш учун пойтахт ёки вилоят марказига бориб, бир ойлик мажбурий курсларда ўқиши талаби бекор қилинади.

Унинг ўрнига ўқитувчиларга тоифа синовидаги натижасига қараб, 18 соатдан 72 соатгача мустақил касбий ривожланиш учун ваучер берилади. Педагог малака ошириш жойини ўзи танлайди, харажатлар давлат томонидан қопланади.

Шавкат Мирзиёев учрашувда бу чоралар педагогларнинг касбий салоҳиятини ошириш ва таълим сифатига натижага асосланган ёндашувни кучайтиришга қаратилганини таъкидлади.