Ўзбекистон дунёдаги энг кучли армиялар рейтингида нечанчи ўринда?

Global Firepower ташкилоти 2026 йил учун дунё мамлакатларининг ҳарбий салоҳияти рейтингини эълон қилди. 
Рўйхатда 145 та давлат ўрин олган.

Рейтингда биринчи ўринни АҚШ эгаллаган. Россия иккинчи, Хитой учинчи ўриндан жой олган. Ҳиндистон тўртинчи, Жанубий Корея эса бешинчи ўринни банд этган.

Кучли ўнликка, шунингдек, Франция, Япония, Буюк Британия, Туркия ва Италия кирган.

Global Firepower рейтингида етакчи давлатлар

Рейтингда мамлакатларнинг PowerIndex кўрсаткичи ҳам келтирилган. Ушбу индекс қанчалик кичик бўлса, мамлакатнинг рейтингдаги натижаси шунчалик юқори ҳисобланади.

2026 йилги рейтингда давлатлар қуйидаги кўрсаткичлар билан қайд этилган:

1) АҚШ — 0,0741;

2) Россия — 0,0791;

3) Хитой — 0,0919;

4) Ҳиндистон — 0,1346;

5) Жанубий Корея — 0,1642;

6) Франция — 0,1798;

7) Япония — 0,1876;

8) Буюк Британия — 0,1881;

9) Туркия — 0,1975;

10) Италия — 0,2211.

Марказий Осиё давлатлари рейтинги

Марказий Осиё мамлакатлари орасида Ўзбекистон энг юқори ўринни эгаллаган. Қолган давлатлар рейтингда қуйидагича жойлашган:

Ўзбекистон — 53-ўрин;

Қозоғистон — 58-ўрин;

Туркманистон — 78-ўрин;

Тожикистон — 100-ўрин;

Қирғизистон — 108-ўрин.

Рейтингнинг энг қуйи учта поғонасидан Марказий Африка Республикаси 143-ўрин, Белиз 144-ўрин ва Бутан 145-ўрин билан жой олган.

Global Firepower рейтинги қандай ҳисобланади?

Global Firepower маълумотларига кўра, рейтингни шакллантиришда 60 дан ортиқ омил ҳисобга олинади. Улар қаторига ҳарбий шахсий таркиб, ҳарбий техника, молиявий имкониятлар, логистика, табиий ресурслар ва географик хусусиятлар киради.

Ташкилот қўшимча коэффициентлардан ҳам фойдаланади. Муаллифларнинг тушунтиришича, бу ёндашув кичик, аммо технологик жиҳатдан ривожланган мамлакатларни йирик давлатлар билан қиёслаш имконини беради.

PowerIndex кўрсаткичининг назарий идеал қиймати нол ҳисобланади. Бироқ ташкилот амалда қўлланиладиган формула доирасида бундай натижага эришиб бўлмаслигини таъкидлайди.

Мамлакатнинг рейтингдаги ўрни алоҳида қурол-яроғ тури ёки диаграммадаги муайян кўрсаткич асосида эмас, балки умумий PowerIndex қиймати бўйича белгиланади.

2026 йилги баҳолашда интернет билан қамраб олинган аҳоли улуши ҳам янги омил сифатида киритилган. Global Firepower маълумотлар базасида авиация, қуруқлик ва денгиз техникаси, ҳарбий бюджетлар, портлар, аэродромлар, темир йўллар ҳамда автомобиль йўллари тармоғи бўйича алоҳида маълумотлар мавжуд.

Якуний рейтинг ушбу маълумотларни қуруқликда, денгизда ва ҳавода анъанавий ҳарбий воситалар билан уруш олиб бориш салоҳиятининг умумий баҳосига бирлаштиради.

АҚШ авиация ва авианосецлар сони бўйича етакчи

Global Firepower маълумотлар базасида АҚШ 13 032 та учиш аппарати билан биринчи ўринда қайд этилган. Ушбу кўрсаткич турли вазифаларга мўлжалланган самолётлар ва вертолётларни қамраб олади.

Шунингдек, АҚШ ҳарбий-денгиз флоти таркибида 11 та авианосец кўрсатилган.

Ташкилот маълумотларидаги бундай рақамлар техника бир вақтнинг ўзида тўлиқ жанговар шай ҳолатда эканини англатмайди. Улар рейтингда фойдаланилган ҳисоб-китоб кўрсаткичларидир.

Муаллиф: Ҳасанбой ОЧУН