Ўзбекистон паспорти жаҳон рейтингида нечанчи ўринда?

Янгиланган Henley Passport Index натижаларига кўра, Ўзбекистон паспорти 2025 йилда 72-ўриндан жой олди. Бу кўрсаткич ўзбекистонликларга дунёнинг 62 давлатига визасиз сафар қилиш имконини беради.

Рейтингда биринчи ўринни Сингапур эгаллаган бўлиб, унинг фуқаролари 193 та давлатга визасиз кириш ҳуқуқига эга. Ундан кейинги ўринларда Япония ва Жанубий Корея жойлашган — уларнинг ҳар бири 190 та мамлакатга визасиз сафар қила олади.

Марказий Осиёда энг юқори натижа Қозоғистонга тегишли бўлиб, мамлакат паспорти 61-ўриндан жой олди. Ундан кейин Қирғизистон (71-ўрин), Ўзбекистон (72-ўрин), Тожикистон (78-ўрин) ва Туркманистон (84-ўрин) қайд этилган. Шу билан бирга, Қозоғистон Озарбайжон (66-ўрин), Арманистон (69-ўрин) ва Мўғулистонни (70-ўрин) ҳам ортда қолдирди.

Рейтингнинг энг охирида эса Афғонистон, Ироқ ва Сурия паспортлари жой олган бўлиб, улар энг заиф саёҳат имкониятларига эга ҳисобланади.