Oʻzbekiston pasporti jahon reytingida nechanchi oʻrinda?

Yangilangan Henley Passport Index natijalariga koʻra, Oʻzbekiston pasporti 2025 yilda 72-oʻrindan joy oldi. Bu koʻrsatkich oʻzbekistonliklarga dunyoning 62 davlatiga vizasiz safar qilish imkonini beradi.

Reytingda birinchi oʻrinni Singapur egallagan boʻlib, uning fuqarolari 193 ta davlatga vizasiz kirish huquqiga ega. Undan keyingi oʻrinlarda Yaponiya va Janubiy Koreya joylashgan — ularning har biri 190 ta mamlakatga vizasiz safar qila oladi.

Markaziy Osiyoda eng yuqori natija Qozogʻistonga tegishli boʻlib, mamlakat pasporti 61-oʻrindan joy oldi. Undan keyin Qirgʻiziston (71-oʻrin), Oʻzbekiston (72-oʻrin), Tojikiston (78-oʻrin) va Turkmaniston (84-oʻrin) qayd etilgan. Shu bilan birga, Qozogʻiston Ozarbayjon (66-oʻrin), Armaniston (69-oʻrin) va Moʻgʻulistonni (70-oʻrin) ham ortda qoldirdi.

Reytingning eng oxirida esa Afgʻoniston, Iroq va Suriya pasportlari joy olgan boʻlib, ular eng zaif sayohat imkoniyatlariga ega hisoblanadi.