Ўзбекистонлик мигрантлар 10 ойда 15,8 миллиард доллар пул жўнатгани маълум қилинди

Президент Шавкат Мирзиёевга меҳнат миграцияси тизимини халқаро стандартларга мос равишда такомиллаштириш бўйича амалга оширилаётган ишлар ҳақида ахборот тақдим этилди.

Сўнгги йилларда фуқароларнинг чет элга тартибли жўнатилиши бўйича олиб борилаётган ислоҳотлар натижасида меҳнат бозори диверсификация қилинмоқда. 

Тақдимотда хорижий меҳнат бозорида малакали мутахассисларга талаб ошгани қайд этилди. Ҳозирда 140 минг нафар мутахассисга буюртма мавжуд, бироқ тил ва касбий кўникмаларга қўйиладиган талаблар юқорилиги туфайли етарли кадрлар тайёрлашда ҳали муаммолар борлиги билдирилди. Шунингдек, миграция хизматларининг тарқоқлиги фуқаролар учун ортиқча оворагарчилик келтирмоқда.

Соҳадаги хизматларни бирлаштириш мақсадида Тошкентнинг Учтепа туманида “Хорижга ишга тайёрлаш маркази”, Термизда эса “Ягона миграция хизматлари” маркази ташкил этилиши белгиланди. Яшнобод туманида эса халқаро компаниялар билан ҳамкорликда немис ва япон тиллари бўйича ўқув мактаблари очилади.

Ўзбекистонликларнинг Европа мамлакатларига миграция оқими охирги йилларда 4 баробар ошгани таъкидланиб, бу йўналишда ҳуқуқий ҳимояни кучайтириш зарурлиги қайд этилди. Айрим Европа давлатлари билан меҳнат миграцияси бўйича келишувлар мавжуд эмаслиги сабабли, тегишли ҳукуматлараро ҳужжатларни имзолаш жараёнини тезлаштириш топширилди.

Шунингдек, хорижда миграция атташелари ва агентлик ваколатхоналарини кўпайтириш, мамлакат ичида виза марказларининг кўчма офисларини очиш режалаштирилган.

Тақдимотда миграция хизматларини рақамлаштириш масаласи ҳам муҳокама қилинди. “Хорижда иш” платформасида 25 та сервис таклиф этилмоқда, жорий йил бошидан буён 524 минг фуқаро онлайн хизматлардан фойдаланган. Аммо барча жараёнлар тўлиқ рақамлаштирилмаган. 

Президент сунъий интеллект технологияларини жорий этиш зарурлигини таъкидлар экан, биометрик идентификация, реал вақт режимида хориждаги иш ўринларини кузатиш ва масофадан маслаҳат бериш бўйича режаларга эътибор қаратилди. Миграция агентлигида 24/7 ишлайдиган ситуацион марказ очиш таклиф қилинди.

Шунингдек, ноқонуний миграция ва фирибгарлик билан шуғулланувчи консалтинг хизматларининг кўпайгани қайд қилинди. Аэропортларда интерактив инфокиосклар ўрнатиш ва лицензиясиз ташкилотлар учун жарималарни ошириш таклиф этилди. Ноқонуний миграцияни ташкил этиш учун жавобгарликни Жиноят кодексига киритиш масаласи ҳам кўриб чиқилади.