Oʻzbekistonlik migrantlar 10 oyda 15,8 milliard dollar pul joʻnatgani maʼlum qilindi

Prezident Shavkat Mirziyoyevga mehnat migratsiyasi tizimini xalqaro standartlarga mos ravishda takomillashtirish boʻyicha amalga oshirilayotgan ishlar haqida axborot taqdim etildi.

Soʻnggi yillarda fuqarolarning chet elga tartibli joʻnatilishi boʻyicha olib borilayotgan islohotlar natijasida mehnat bozori diversifikatsiya qilinmoqda. 

Taqdimotda xorijiy mehnat bozorida malakali mutaxassislarga talab oshgani qayd etildi. Hozirda 140 ming nafar mutaxassisga buyurtma mavjud, biroq til va kasbiy koʻnikmalarga qoʻyiladigan talablar yuqoriligi tufayli yetarli kadrlar tayyorlashda hali muammolar borligi bildirildi. Shuningdek, migratsiya xizmatlarining tarqoqligi fuqarolar uchun ortiqcha ovoragarchilik keltirmoqda.

Sohadagi xizmatlarni birlashtirish maqsadida Toshkentning Uchtepa tumanida “Xorijga ishga tayyorlash markazi”, Termizda esa “Yagona migratsiya xizmatlari” markazi tashkil etilishi belgilandi. Yashnobod tumanida esa xalqaro kompaniyalar bilan hamkorlikda nemis va yapon tillari boʻyicha oʻquv maktablari ochiladi.

Oʻzbekistonliklarning Yevropa mamlakatlariga migratsiya oqimi oxirgi yillarda 4 barobar oshgani taʼkidlanib, bu yoʻnalishda huquqiy himoyani kuchaytirish zarurligi qayd etildi. Ayrim Yevropa davlatlari bilan mehnat migratsiyasi boʻyicha kelishuvlar mavjud emasligi sababli, tegishli hukumatlararo hujjatlarni imzolash jarayonini tezlashtirish topshirildi.

Shuningdek, xorijda migratsiya attashelari va agentlik vakolatxonalarini koʻpaytirish, mamlakat ichida viza markazlarining koʻchma ofislarini ochish rejalashtirilgan.

Taqdimotda migratsiya xizmatlarini raqamlashtirish masalasi ham muhokama qilindi. “Xorijda ish” platformasida 25 ta servis taklif etilmoqda, joriy yil boshidan buyon 524 ming fuqaro onlayn xizmatlardan foydalangan. Ammo barcha jarayonlar toʻliq raqamlashtirilmagan. 

Prezident sunʼiy intellekt texnologiyalarini joriy etish zarurligini taʼkidlar ekan, biometrik identifikatsiya, real vaqt rejimida xorijdagi ish oʻrinlarini kuzatish va masofadan maslahat berish boʻyicha rejalarga eʼtibor qaratildi. Migratsiya agentligida 24/7 ishlaydigan situatsion markaz ochish taklif qilindi.

Shuningdek, noqonuniy migratsiya va firibgarlik bilan shugʻullanuvchi konsalting xizmatlarining koʻpaygani qayd qilindi. Aeroportlarda interaktiv infokiosklar oʻrnatish va litsenziyasiz tashkilotlar uchun jarimalarni oshirish taklif etildi. Noqonuniy migratsiyani tashkil etish uchun javobgarlikni Jinoyat kodeksiga kiritish masalasi ham koʻrib chiqiladi.