Россиялик овчи нима асосга кўра Қизил китобга киритилган морхўрни овлади? Экология вазирлиги жавоб берди

Экология, атроф-муҳитни муҳофаза қилиш ва иқлим ўзгариши вазирлиги 2024 йилда Сурхондарё вилоятидаги ов қонунчиликда белгиланган тартибда, тегишли тўлов эвазига рухсатнома асосида амалга оширилганлигини маълум қилди.

Ўзбекистон Республикасининг “Ов қилиш ва овчилик хўжалиги тўғрисида”ги Қонунига кўра, Қизил китобга киритилган ёввойи ҳайвонлар сони Фанлар академияси мутахассислари томонидан доимий ҳисоблаб борилади ва уларнинг хулосасига асосан популяцияга таъсир қилмайдиган миқдорда овлаш учун рухсат берилади. Бунинг учун белгиланган тартибда тўлов ундирилади.

Хусусан, 2024 йилда морхўрларни овлаш учун ўрнатилган тартибда рухсат берилган ва 100 000 АҚШ доллари миқдорида тўлов ундирилган. Бу маблағлар табиатни муҳофаза қилиш, хусусан, браконерликка қарши самарали кураш олиб боришга йўналтирилган.

Таъкидлаш жоизки, “Ов қилиш ва овчилик хўжалиги тўғрисида”ги Қонунга кўра, ҳар йили ёввойи ҳайвонларни тутиш учун квота белгиланади. Бунда ёввойи ҳайвонларнинг энг ёши каттаси, насл қолдириш давридан ўтган эркагини овлашга рухсат берилади ва жараён қатъий назорат остида амалга оширилади.

Маълумот учун, хорижий давлатларда ҳам айнан шундай тартиб жорий қилинган. Хусусан, Намибияда ўлжа ови йилига 3 млн доллардан кўп фойда келтиради. Бундан ташқари, очиқ маълумотларга кўра, ҳар йили Тожикистонда 10–16 бош морхўр, 100–115 бош архар, Мўғулистонда эса 90–100 бош архар, 50–60 бошгача хонгул овлашга рухсатномалар берилмоқда.