Саида Мирзиёева Андижондаги эски ижтимоий объектларни янгилаш бўйича топшириқ берди

Жумладан, Олтинкўл туманидаги “Кўмакай” оилавий поликлиникаси биноси 1988 йилдан буён фойдаланиб келинаётгани ва замонавий тиббиёт талабларига жавоб бермаслиги қайд этилди.

Шунингдек, 9-сонли давлат мактабгача таълим ташкилоти ҳамда 36-сонли мактабдаги шароитлар ҳам ўрганилди. Боғча 1970 йилларда қурилган собиқ оромгоҳ ҳудудида жойлашган бўлса, мактаб биноси 1960 йилда барпо этилган ва бугунги ўқувчилар сонига мос келмайди.

Маълум қилинишича, ҳар икки таълим муассасаси замонавий талаблар асосида қайта қурилади.

Саида Мирзиёева таълим ва тиббиёт соҳасида инсон манфаати биринчи ўринда туриши кераклигини таъкидлади.

“Шифокор ва ўқитувчининг иш жойи, яратилган шароит, фарзандини мактаб ёки боғчага кузатаётган ота-онанинг кўнгли тўқ бўлиши — энг муҳим масаладир. Одамлар турмушини яхшилашга қаратилган ўзгаришлар ўн йиллаб чўзилмаслиги керак”, — деди у.

Унинг таъкидлашича, аҳоли ҳаётига таъсир қилувчи лойиҳаларда натижа қисқа вақт ичида сезилиши ва амалий ўзгаришлар тез намоён бўлиши лозим.