Сурхондарёда халқаро аҳамиятга эга кўприкка талафот етди

Вилоят ҳокимлиги Сариосиё туманидаги Обизаранг дарёси устидаги кўприкда юзага келган ҳолат юзасидан расмий ахборот берди.

2026 йил 21 июнь куни тахминан соат 20:30-20-45 атрофида тоғли ҳудудларда кузатилган ёғингарчиликлар оқибатида Обизаранг дарёсида сув сатҳи кескин ошиб, сел оқими юзага келди.

Табиий ҳодиса оқибатида Сариосиё тумани "Анорзор" маҳалласи ҳудудидан оқиб ўтувчи Обизаранг дарёси устидаги, М-41 "Бишкек – Душанбе – Термиз" халқаро аҳамиятга эга автомобиль йўлининг 1449-километрида жойлашган кўприкка зарар етди.

Иншоотга етган зарарга асосий сабаб — ёғингарчиликлар натижасида дарёда сув сатҳи ва оқим тезлиги кескин ортиб, кўприк таянчларига юқори босим тушган.

Кўприк конструксияларида шикастланишлар аниқлангач, мазкур йўналишда транспорт ҳаракати вақтинча тўхтатилди.

Ҳозирда автотранспорт ҳаракати Узун тумани ҳудудидаги Дўстлик, Янги йўл ва Қарашиқ маҳаллалари орқали ўтувчи айланма йўналиш бўйича ташкил этилган.

Айни пайтда мутахассислар томонидан кўприкнинг техник ҳолати ўрганилмоқда, етказилган зарар кўлами баҳоланмоқда ҳамда транспорт қатновини тиклаш бўйича зарур муҳандислик чора-тадбирлари ишлаб чиқилмоқда.

Мазкур кўприк 1977 йилда қурилган бўлиб, узунлиги 54,7 метрни ташкил этади. У Тожикистон Республикаси билан боғловчи муҳим транспорт йўналишларидан бири ҳисобланиб, кўприк орқали соатига ўртача 600–800 та автотранспорт воситаси ҳаракатланади.