Тошкент жамоат транспорти парки 202 та янги YUTONG электробус билан бойиди

Тантанали топшириш маросимида Тошкент шаҳар ҳокими, Транспорт вазири Илҳом Маҳкамов, Олий Мажлис депутатлари, жамоатчилик вакиллари ҳамда блогерлар иштирок этди. Маросимда вазир янги ҳаракат таркибини қабул қилган ҳайдовчилар ва “Тошшаҳартрансхизмат” АЖ жамоасини қутлаб, уларнинг меҳнатини алоҳида таъкидлади.

Тизимдаги янгиликлар ва натижалар:

2025 йилнинг иккинчи чорагида кунлик йўловчи ташиш ҳажми 1,4 миллион нафарга етди;

Йўналишлар умумий узунлиги 2 945 кмдан 2 990,8 кмгача кенгайди;

Жамоат транспортининг ўртача тезлиги 18 км/соатдан 21 км/соатгача ошди;

Электробуслар учун 100 та қувватлаш ускунаси ўрнатилди.

Янги электробуслар шаҳар ҳавосини софлаштиришга хизмат қилади. Ҳисоб-китобларга кўра, сўнгги йилларда автобуслардан чиқадиган зарарли моддалар миқдори ҳар ойда 93,3 тоннага камайган.

2030 йилгача мақсад:

Шаҳарда жами 1 200 та электробус харид қилиниб, уларнинг умумий улуши жамоат транспорти паркларида 63 фоизгача етказилади. Бу эса экология, қулайлик ва энергия тежамкорлик йўналишидаги муҳим қадам ҳисобланади.