Тошкентда реновация лойиҳаларининг биринчи босқичи старт олди

Бу ҳақда Тошкент шаҳар ҳокимлиги Матбуот хизмати хабар берди.

Маълум қилинишича, дастлабки босқичда аҳоли, ташаббускор гуруҳлар ҳамда лойиҳа иштирокчилари реновация жараёнининг мазмуни, амалга ошириш тартиби, таклиф этилаётган ҳудудлар, кўчириш шартлари ва бошқа муҳим масалалар билан таништирилади.

Пойтахт ҳокими Шавкат Умурзоқов раҳбарлигидаги ишчи гуруҳ Яшнобод, Миробод ва Сергели туманларида ташкил этилган реновация штаблари фаолияти билан танишди.

Хусусан, Яшнобод туманидаги «Жарқўрғон», Миробод туманидаги «А. Фитрат» ҳамда Сергели туманидаги «Хонободтепа» маҳаллаларида жойлашган штаблар кўздан кечирилди.

Ҳокимлик маълумотига кўра, бундай штаблар ҳар бир реновация ҳудудида фаолият юритади. Улар аҳоли билан ишлаш, мурожаатларни қабул қилиш ва реновация жараёнига оид масалаларни жойида ҳал этиш учун хизмат қилади.

Штаблар таркибига ҳокимликлар, прокуратура, ички ишлар органлари, Миллий гвардия, солиқ идоралари, Мажбурий ижро бюроси, коммунал хизматлар, кадастр, адлия ва қурилиш ташкилотлари, маҳалла вакиллари, шунингдек, газ, электр, сув ва иссиқлик таъминоти соҳаси мутахассислари, банклар, нотариат ҳамда бошқа масъул ташкилотлар вакиллари киритилган.