Яшнободда ижарага олинган уйда нарколаборатория аниқланди

Тошкентда “закладчик”лар гуруҳи ва нарколаборатория аниқланди. Бу ҳақда Ички ишлар вазирлиги хабар қилди.

Қайд этилишича, 2025 йил, 22 октябрь куни пойтахтда психотроп моддаларни “закладка” усулида тарқатувчи уюшган жиноий гуруҳ аъзоларининг 4 нафари ашёвий далиллар билан қўлга тушди.

Учтепа туманида уларнинг 2 нафари текширилганида ёнларидан 353 дона “Прегабалин” ва 25 дона “Тропикамид” кучли таъсир қилувчи воситалари топилган.

Тезкор тадбирлар давомида Яшнабод туманида фуқаролар вақтинча яшаб келган хонадонда нарколаборатория ташкил этилгани ҳам аниқланган. У ердан 50 килограмм ва 1200 дона қадоқланган прегабалин, 2 килограмм ҳамда 400 дона қадоқланган тропикамид, 2 литрда хомашёлар, 112 минг та қадоқлаш учун керакли воситалар аниқланган.

“Закладка” – наркотик моддаларни оммага тарқатиш усули: сотувчилар дорини кичик тўпча ёки халтачаларга солиб, оммавий жойларда (тошлар ости, дарахт таглари, бинолар атрофи ва ҳ.к.) яшириб қўяди, харидор уларнинг манзилини хабар ёки илова орқали олиб, моддани олиб кетади.