Иккинчи синф ўқувчиларидан солиқларни ўз вақтида тўлаш талаб этилди

Видеода солиқ инспекция ходимлари 2-синф ўқувчиларини янги ўқув йили билан табриклаган ҳамда болаларга ота-оналари солиқларини вақтида тўлаши кераклигини уқтирган. Шунингдек, тасвирда уларга эслатма хати тарқатгани ҳам акс этган.

“Авваламбор, ҳаммангизни байрам билан табриклаймиз. Янги ўқув йилида ўқишларингизга омад. Биз Нишон тумани Солиқ инспекциясидан келяпмиз. Сизлардан битта илтимосимиз бор. Ҳозир сизларга эслатма ўқиб берамиз. Буни ота-онангизга берасизлар ва улар ўзингиз яшаб турган ҳудуддаги солиқ инспекциясига бориб ёки телефондан солиқ иловаси орқали қарзларини ҳисоблатиб тўлов қилишлари керак. Бир йилда солиққа икки марта тўлов қилинадиган бўлса, биринчи тўлов 15 апрелдан 15 октябрга қадар тўланиши керак. Иложи борича шу ойдан солиқларни тўлаб кетиш талаб этилади, тушундиларингми?”, дейди ходим.

Шунингдек, улар ўқувчиларга Конституциядан солиққа доир моддани ўқиб эшиттириб, солиқларга вақтида тўлов қилиш кераклигини ҳам уқтирган.

“Қўлингизда турган қоғозда Ўзбекистон Республикаси Конституциясининг 63-моддаси ёзилган. Унда Ўзбекистон фуқаролари вақтида солиқларни тўлаши кераклиги шарт деб айтилган, Тушундиларингми?”, дейа “дарс”ни давом этган.

Юқорида қайд этилган ҳолат юзасидан Болалар омбудсмани муносабат билдирди. 

“Мактаб ўқув жараёни иштирокчиси бўлмаган бегона шахсларни таълимга оид тартиб-қоидаларини қўпол равишда бузган ҳолда дарс жараёнига кириб бориши ва уни бузиши, болаларга қандайдир ноқонуний талаблар билан мурожаат қилиши — мутлақо йўл қўйиб бўлмайдиган ҳолат”, дейилади Болалар омбудсмани изоҳида.

Шунингдек, омбудсманининг ахборот хизмати парталида болалар ўз ота-оналарининг солиққа оид мажбуриятлари учун жавобгар эмас, ҳеч бир ҳолатда уларни бу жараёнга жалб қилиш, огоҳлантириш мумкин эмас, дея таъкидлаган.

Бундан ташқари, хабарда бундай ножўя ҳаракатларга йўл қўйган масъулларга тегишли тарзда чора кўрилиши шарт, дея қўшимча қилинган.