Turkiyada zaharlanish ortidan 14 nafar oʻzbekistonlik vafot etdi

Joriy yilning 16 yanvar holatiga koʻra, Turkiya hududida qalbaki spirtli ichimlik isteʼmoli oqibatida yana 4 nafar Oʻzbekiston fuqarosi (barchasi erkak) vafot etgan. 15 yanvar kuni esa 4 nafar, 14 yanvar kuni 6 nafar oʻzbekistonlik zaharlanish oqibatida halok boʻlgan edi. 

Olingan maʼlumotlarga koʻra, bugun qalbaki spirtli ichimlik isteʼmoli tashxisi bilan Turkiya boʻylab kasallanganlar soni 88 nafarni tashkil etib, shundan 37 nafari vafot etgan. Ushbu qurbonlar orasida mahalliy aholi vakillari va boshqa millat vakillari ham mavjud. 

Istanbul hokimligi tomonidan taqdim etilgan maʼlumotga koʻra, mahalliy huquq-tartibot idoralari 2025 yil 16 yanvar kuni Istanbul shahrida 32 862 litr noqonuniy metil va etil spirtli ichimliklarni musodara qilgan. Tadbirlar Sultangazi, Fatih, Bakirkoʻy, Kuchukchekmeje, Chatalja, Esenyurt, Zeytinburnu va Beykoz tumanlarida oʻtkazilib, 9 nafar gumonlanuvchi qoʻlga olingan. 

Tekshiruvlar chogʻida 227 shisha soxta ichimlik va distillash uskunasi ham topilgan. Qoʻlga olinganlardan 3 nafari politsiyadagi soʻroqlardan soʻng qoʻyib yuborilgan boʻlsa, 6 nafarining tergovi davom etmoqda. 

Bosh konsulxona diplomatlari Istanbul shahridagi shifoxonalarning jonlantirish boʻlimlarida qalbaki spirtli ichimlikdan zaharlanish oqibatida davolanayotgan oʻzbekistonlik fuqarolarning holidan xabar olgan. Ular ochiqlagan maʼlumotlarga koʻra, zaharlanganlarning 3 nafari ogʻir ahvolda. 

Shuningdek, Bosh konsulxona Turkiyada boʻlib turgan barcha Oʻzbekiston fuqarolarini spirtli ichimliklardan tiyilishga va shaxsiy xavfsizlik qoidalariga qatʼiy rioya qilishga chaqirgan.