Chiroyli avtoraqamlarni auksion orqali sotish amaliyoti bekor qilinadi

2026 yil 1 yanvardan Oʻzbekistonda transport vositalari uchun «chiroyli» davlat raqami belgilarini auksion orqali sotish tartibi bekor qilinadi. Bu haqda Vazirlar Mahkamasi qarorida belgilab qoʻyilgan. Unda avvalgi jarayonning «murakkab» ekani taʼkidlangan.

«Fuqarolar uchun auksion savdolarida ishtirok etish tartibi murakkab va koʻp vaqt talab etishi, ayrim toifadagi davlat raqami belgilari uchun boshlangʻich narxlar yuqoriligi keng aholi qatlami uchun bunday raqamlarni sotib olish imkoniyatini cheklamoqda», deyiladi hujjatda.

Qarorga muvofiq, 2026 yil 1 yanvardan boshlab, Oʻzbekiston respublika tovar-xomashyo birjasi (OʻzRTXB) tizimida har qanday raqam belgilarini sotish boʻyicha auksionlar, shuningdek, «chiroyli» raqamlarni oshirilgan stavkalarda berish tartibi bekor qilinadi.

Yangi tartibga koʻra, jismoniy va yuridik shaxslar toʻgʻridan-toʻgʻri elektron murojaat asosida onlayn rejimda uzluksiz ravishda yangilanib turadigan yagona ochiq maʼlumotlar bazasida boʻsh turgan istalgan harf va raqamlar kombinatsiyasiga ega boʻlgan davlat raqami belgilarini tanlab olishi mumkin boʻladi.

Ushbu bazadan quyidagi axborot tizimlari orqali foydalanish mumkin:

- IIV roʻyxatdan oʻtkazish boʻlinmalarida joylashgan infokiosklar;

- Yoʻl harakati xavfsizligi xizmatining mobil ilovasi;

- YHXX rasmiy veb-sayti;

- Yagona interaktiv davlat xizmatlari portali.

Tanlangan raqam yagona oshirilgan toʻlov evaziga beriladi, uning miqdori esa 2025 yil 1 oktabrdan boshlab, «Uzavtomotobelgi» davlat unitar korxonasi tomonidan belgilanadi.

OʻzRTXB 2025 yil 1 oktabrdan boshlab «chiroyli» davlat raqami belgilarining auksion savdolarini toʻxtatadi.

Auksionga qoʻyilib, sotilmagan, shuningdek, ishlab chiqarilib, sotilmagan «chiroyli» davlat raqami belgilari:

- 1−3-toifadagi davlat raqami belgilari Uzavtomotobelgi tomonidan belgilangan yagona oshirilgan toʻlov evaziga beriladi;

- 4−6-toifadagi davlat raqami belgilari «chiroyli» boʻlmagan davlat raqami belgilarini berishning amaldagi tartibida beriladi.

Eslatib oʻtamiz, Uzavtomotobelgi davlat unitar korxonasi 2026 yil 1 yanvardan boshlab harf va raqam kombinatsiyalariga ega boʻlgan noyob davlat raqamlarini ochiq elektron auksion orqali taqdim etish huquqiga ega.