Elektr, gaz, suv, issiqlik taʼminoti boʻyicha ortiqcha undirilgan salkam 20 mlrd soʻm qaytarildi

Qayd etilishicha, elektr energiyasi sohasida – 5,5 mlrd soʻmga yaqin, tabiiy gaz sohasida – 7,5 mlrd soʻmga yaqin, ichimlik suv taʼminoti sohasida – 2,5 mlrd soʻmga yaqin, issiqlik taʼminoti sohasida – 4,5 mlrd soʻmdan mablagʻ qaytarilgan.

Jumladan, Samarqand viloyati hududiy boshqarmasi “Ishsizlarni kasb-hunarga oʻrgatish markazi” murojaati asosida “Samarqand suv taʼminoti” AJ tomonidan (ichimlik suvidan) asossiz hisoblangan 263 mln soʻm mablagʻni qayta hisob-kitob qilinishi taʼminlangan.

Qoraqalpogʻiston Respublikasi Raqobat qoʻmitasiga kelib tushgan murojaatlar boʻyicha “Hududiy elektr tarmoqlari” AJ “Energosavdo” filiali Beruniy tumani boʻlinmasi tomonidan “Xoji Karimov” fermer xoʻjaligiga nisbatan asossiz hisoblangan 86 mln soʻmdan ortiq mablagʻni, “Qoraqalpoq suv taʼminoti” AJ tomonidan 48 mingdan ortiq isteʼmolchiga asossiz hisoblangan 2 mlrd soʻmdan ortiq mablagʻni (Nukus tumanlararo iqtisodiy sudining hal qiluvchi qarori asosida) qayta hisob-kitob qilinishiga erishilgan.

Navoiy viloyati hududiy boshqarmasi tomonidan “Issiqlik manbai” DUK murojaati asosida “Hududgaz Navoiy” gaz taʼminoti filiali tomonidan asossiz hisoblangan (1,6 mln m3 dan ortiq tabiiy gaz uchun) 2,5 mlrd soʻmga yaqin mablagʻ (Karmana tumanlararo iqtisodiy sudining hal qiluvchi qarori asosida) qayta hisob-kitob qilingan.

Iyul oyida Raqobatni rivojlantirish va isteʼmolchilar huquqlarini himoya qilish qoʻmitasi Fargʻonada chiqindi tashish xizmati uchun aholidan 1,7 mlrd soʻm asossiz undirilganini maʼlum qilgandi.  Chiqindilarni boshqarish va sirkulyar iqtisodiyotni rivojlantirish agentligi bunga qarshi raddiya bergandi.