Gaz quyish shoxobchalarida xavfsizlik va shaffoflikni taʼminlovchi “UGaz” tizimi ishga tushirildi

Qisqacha izohlaganda “UGaz” avtomashinalarga gaz toʻldirish kompressor shoxobchalari (AGTKSh)dagi jarayonlarni real vaqtda qayd etadi, shu bilan qoʻlda hisob-kitoblarni kamaytiradi, noqonuniy holatlarning oldini oladi va isteʼmolchilar xavfsizligini oshiradi.

Asosiy imkoniyatlar va afzalliklar

Real vaqt qaydi — har bir shoxobcha va har bir toʻldirish kolonkasi faoliyati onlayn tarzda kuzatiladi;

Shaffof hisob-kitob — sotilayotgan gaz hajmlari aniq va elektron tarzda hisoblanadi; noqonuniy foydalanish holatlari sezilarli darajada kamayadi;

Avtomatik tekshiruv va ogohlantirishlar — avtotransport kirganda uning texnik koʻrik holati tekshiriladi, muddat tugagan boʻlsa operatorga avtomatik xabar yuboriladi;

Ballon va yoqilgʻi turiga nazorat — yoqilgʻi turi mos kelmasa yoki ballon roʻyxatdan oʻtmagan boʻlsa, tizim shu joyning oʻzida operatorni ogohlantiradi;

Xavfsizlikni oshirish — AGTKShlardagi xodim va kolonkalar faoliyati nazorat qilinishi tufayli haydovchi va yoʻlovchilar xavfsizligi yaxshilanadi;

Qoʻlda hisoblashdan voz kechish — inson omili sababli xatolar kamayadi, monitoring samaradorligi ortishi taʼminlanadi.

Integratsiya va nazorat

“UGaz” tizimi manfaatdor vazirlik va idoralar bilan integratsiya qilingan:

Ichki ishlar vazirligi;

Davlat soliq qoʻmitasi;

“Toshshaxartransxizmat” AJ;

Elektron hukumat tizimlari;

“Energonazorat” platformasi;

OneID va boshqalar.

Bu integratsiya nazoratni kuchaytiradi va tegishli organlarga tezkor maʼlumot yetkazishni taʼminlaydi.

Bu nega muhim?

Fuqarolar uchun — oʻz vaqtida, huquqiy asoslangan va xavfsiz xizmat.

Davlat uchun — tabiiy gaz resurslaridan qonuniy va samarali foydalanish, daromadlarni himoya qilish.

Bozor uchun — adolatli raqobat muhiti, noqonuniy faoliyatning kamayishi.