IESlar yarim yillik rejani 101 foizga bajardi

“Issiqlik elektr stansiyalari” AJ tomonidan 2025 yilning birinchi yarim yilligi yakuni boʻyicha 14 milliard 384 million kVt.soat elektr energiyasi ishlab chiqardi va belgilangan reja 101,5 foizga bajarildi. 

Jamiyat tomonidan 2025 yilda barcha moliyalashtirish manbalari hisobidan 17 ta investitsiya loyihalari doirasida reja boʻyicha 701,93 million AQSh dollari oʻzlashtirilishi belgilangan.

Bunda birinchi yarim yillik uchun oʻzlashtirilishi rejalashtirilgan mablagʻ 234,93 million AQSh dollarini tashkil etgan boʻlsa, loyihalar doirasida amalda 286,85 million AQSh dollari oʻzlashtirildi va  birinchi yarim yillik boʻyicha oʻzlashtirish koʻrsatkichi 121,7 foizga bajarilishiga erishildi.

Hozirda “Toshkent shahrining issiqlik taʼminoti soʻnggi nuqtalarida joylashgan 6 ta mahallada kogeneratsiya loyihalarini amalga oshirish” investitsiya loyihasi doirasida Sergeli tumanining Oʻzgarish mahallasida zamonaviy kogeneratsiya qurilmasi foydalanishga topshirilishi kutilmoqda. 

Shuningdek, ayni paytda Yunusobod tumanidagi 4-son issiqlik markazi hududida 100 MVt quvvatga ega gaz-porshenli qurilmasi, Tolimarjon IESda umumiy quvvati 1065 MVt boʻlgan va Navoiy IES da umumiy quvvati 650 MVt boʻlgan zamonaviy bugʻ-gaz qurilmalari bunyod etish ishlari davom ettirilmoqda.