Ispaniya hukumati Isroil kompaniyalari bilan qariyb 1 mlrd yevrolik ikki shartnomani bekor qildi

Ispaniya axborot agentligi EFE xabariga koʻra, hukumat 9 sentabrda eʼlon qilingan toʻqqiz sanksiya chorasidan biri – Isroilga qurol yetkazib berish embargosini rasmiylashtiruvchi qirollik farmonini hali tasdiqlamagan boʻlsa-da, amalda uni qoʻllashni boshlab yuborgan.

Hukumat manbalari maʼlum qilishicha, qirollik farmoni kelasi hafta qabul qilinishi kutilmoqda, ammo aniq amaliy qadamlar allaqachon tashlangan.

Mudofaa vazirligi qoʻshin ehtiyojlari uchun moʻljallangan ikki shartnomani rasman bekor qilgan:

qiymati 700 mln yevro boʻlgan yuqori mobil reaktiv zalpli oʻt ochish tizimlari – Silam’ni xarid qilish shartnomasi (Rheinmetall Expal Munitions va EM&E qoʻshma korxonasi bilan); 

qiymati 287,5 mln yevro boʻlgan 168 ta Spike L.R. tankka qarshi raketalarini yetkazib berish shartnomasi (Isroilning Rafael konsernining Ispaniyadagi docher kompaniyasi PAP Tecnos Innovacion SA bilan).

Maʼlum qilinishicha, Mudofaa vazirligi Isroil bilan harbiy-texnologik aloqalarni uzish va ispan qurolli kuchlarini zarur dasturiy taʼminot hamda qurol-aslaha bilan taʼminlaydigan muqobillarni topish boʻyicha ishlarni davom ettirmoqda.

Shu bilan birga, qirollik farmonining kechikishi uning matnini tayyorlash murakkabligi va uni Yevropa qonunchiligiga muvofiqlashtirish zarurati bilan izohlanmoqda.