Sirdaryoda o‘qituvchini kaltaklagan opa-singillarning onasi jarimaga tortildi

Qayd etilishicha, aslida 7-oktyabr kuni sodir bo‘lgan voqea 20-oktyabr kuni tarmoqlarda tarqalgan. 2-umumiy o‘rta ta’lim maktabida o‘qiydigan opa-singil o‘quvchilar maktabning jismoniy tarbiya o‘qituvchisi va shu maktabda hamshira bo‘lib ishlaydigan xodimga qo‘l ko‘targan. Dastlab o‘quvchilar hamshira bilan janjallashgan.

"Maktabda o‘quvchilarni darsga kirishini nazorat qiladigan navbatchi tashkil qilganmiz. Janjalga sabab nazoratchining o‘quvchi qizlarga darsga vaqtida kiringlar, degan gapi asnosida yuzaga kelgan. Bu chaqiriqni eshitgan o‘quvchi qizlar navbatchiga sizning ishingiz bo‘lmasin, deb u bilan tortishgan. So‘ng hamshirani kaltaklashgan", deydi maktab direktori.

Holat jiddiy tus olib mahalla inspektoriga yetkazilganda, inspektor kelib o‘quvchi qizlar voyaga yetmaganligi bois ularning onasini ham maktabga chaqirgan. Ayol maktabga kelganida yana janjal boshlangan. Holat hal bo‘lmagani bois ish sayyor sud tartibida maktabning o‘zida ko‘rib chiqilgan. Sudda mahalla profilaktika inspektori yuqorida ta’kidlanganidek, janjalni murosa bilan bartaraf etolmaganini bildirgan.

"Men maktabga kelgan vaqtimda hamma tashqarida turgan edi. Ichkariga kiringlar, bu yerda muhokama qilmaymiz, bizni ko‘rayotgan o‘quvchilarning tarbiyasiga yomon ta’sir qiladi, dedim. Biroq ular gapimni inobatga olmasdan baqir-chaqir qildi. Shunday bo‘lsa ham ular bilan muzokara qilishga harakat qilib xonaga olib kirdim. Voqeani bir boshdan tushuntiringlar, dedim. Yana baqir-chaqir boshlandi. Ularni murosaga keltira olmaganim uchun gaplashishni to‘xtatdik", deydi mahalla inspektori.

Ammo o‘qituvchi va hamshiraga qo‘l ko‘targan opa-singil o‘quvchilarning onasi inspektor tomonidan o‘qituvchilarga qarata besh-oltitangiz bir bo‘lib yozib beringlar, ularni axloq tuzatish koloniyasiga jo‘nataman, degan gaplarni aytgani bois voqea joyidagilar bilan tortishishda davom etganini bildirgan.

"Mening qizimni sen urdingmi, deyayotganimda inspektor ichkariga kiraylik, dedi. So‘ng ichkariga kirdik. Ichkarida ustozlar har xil gapirishdi. Keyin men ularga yana qaysi biring qizlarimni urding, deb savol berdim. Ustozlar esa u meni, bu meni urdi, dedi. Qizlaringizni boshingizga chiqarib olgansiz, deyishdi. Shunda inspektor domlalarning gapiga qo‘shilib, besh-oltita o‘qituvchi yozib beringlar, bularni axloq tuzatish koloniyasiga jo‘natamiz, dedi. So‘ng men inspektorga sen bilgan ishingni qil, men o‘zim bilgan ishni qilaman, deb qizlarimni olib chiqib ketdim", deydi ayol.

Shuningdek, sud jarayonida o‘quvchi qizlardan kaltak yegan o‘qituvchi ham o‘z fikrini bildirib, janjalni to‘xtatishga chiqqanini, shu vaqtda qizlar unga ham tashlanganini aytdi.

"Maktabda ishlaydigan hamkasblarimizdan biri kelib, opa-singil o‘quvchilar yana urish boshladi, dedi. Keyin bu xabarni eshitgan hamma o‘qituvchi janjal bo‘layotgan maktabimizning ikkinchi qavatiga chiqdi. Men voqea joyidan o‘zimni videoga olayotgandek ko‘rsatish uchun telefonimni chiqardim. Ammo videoga olganim yo‘q edi. Shunda qizlardan biri sen tasvirga olyapsanmi, dedi. Shunda ularga tasvirga olmayotganimni isbotlash uchun telefonimni ko‘rsatgandim, ular qo‘limdagi telefonimni birdan tortib oldi. Shu vaqtda aniq esolmayman telefonimni qizlarning qo‘lidan ham kimdir olib qo‘ydi. Keyin qizlar menga tashlanib, meni ham urib ketdi", deydi maktab o‘qituvchisi.

Yuqoridagi holat sud jarayonida ko‘rilganidan so‘ng voyaga yetmagan ikki opa-singil o‘quvchilarning oilaviy sharoiti o‘rganilgan. Aniqlangan ma’lumotlarga tayanib, ya’ni ularning oilasida hech kim ishlamasligi inobatga olinib, o‘quvchilarning onasiga nisbatan Ma’muriy javobgarlik to‘g‘risidagi kodeksning 34-moddasi bilan hamda bazaviy hisoblash miqdorining ikki baravar miqdorida (752 ming so‘m) jarima jazosi belgilandi.