Gulistondagi portlashda halok boʻlganlarning oilalariga moddiy yordam beriladi

4 dekabr kuni davlat rahbari Respublika shoshilinch tibbiy yordam ilmiy markazining Sirdaryo viloyati filialiga borib, jarohatlanganlar holidan xabar oldi.

Filial rahbariyati va shifokorlar Prezidentga bemorlarning holati, davolash jarayoni va koʻrsatilayotgan tibbiy xizmatlar haqida maʼlumot berdi. Shavkat Mirziyoyev palatalarga kirib, turli darajada tan jarohati olgan fuqarolar bilan suhbatlashdi, ularning oila aʼzolari bilan uchrashdi.

Davlat rahbari mutasaddilarga barcha jabrlanuvchilarga zarur tibbiy yordam toʻliq koʻrsatilishini qatʼiy nazoratga olishni topshirdi. Shuningdek, sodir boʻlgan hodisaning sabablarini puxta oʻrganish, qonun ustuvorligini taʼminlash, bunday holatlarning oldini olish va yongʻin xavfsizligi ustidan nazoratni kuchaytirish vazifasi yuklatildi.

Prezident topshirigʻiga muvofiq, 3 dekabr kuni bosh vazir oʻrinbosari Ochilboy Ramatov boshchiligida hukumat komissiyasi tuzilgan. Komissiyaga jabrlanganlarga zarur yordam koʻrsatish, hodisa sabablarini aniqlash va kelgusida bunday baxtsiz hodisalarning oldini olish boʻyicha chora-tadbirlar ishlab chiqish vazifasi yuklangan.

Holat yuzasidan Jinoyat kodeksining 257-moddasi 2-qismi (mehnatni muhofaza qilish qoidalarini buzish odam oʻlishiga yoki ogʻir oqibatlarga sabab boʻlishi) boʻyicha jinoyat ishi qoʻzgʻatilgan va bir shaxs qamoqqa olingan.