Shahrisabz shahrida mast fuqaro qurol yordamida qotillik sodir etdi

Bildirilishicha, ulfatlar kafeda spirtli ichimlik isteʼmol qilib, mast holda bazm pulini toʻlash ustida tortishib qolgan.

Sh.U. tanishi T.A.ga yoʻlda kelayotgan paytda 50 ming soʻm pul berganligini, shu bois ovqatlanish xarajatini toʻliq toʻlashini aytgan. Sherigi esa unga hamma pulni toʻlamasligini bildirib, undan olgan 50 ming soʻm pulini qaytarib bergan. U.Sh. pulni olmasdan unga “Pulni choʻntagingga solib qoʻy”, deya jahl qilib, avtomobilidagi temir quvurdan qoʻlbola usulda yasalgan qurolni olib, sherigining boshiga bir marta oʻq uzgan. Hamda voqea joyidan ketib qolgan. Natijada T.A. olgan tan jarohati oqibatida Shahrisabz shahar tibbiyot birlashmasi shoshilinch tez tibbiy yordam boʻlimiga yotqizilganligi aytilmoqda.

Qoʻshimcha qilinishicha, sherigiga oʻq uzgan U.Sh. hodisa joyidan qochmoqchi boʻlib, avtomobilida ketayotgan paytda voqea joyidan taxminan 500 metr uzoqlikda boʻlgan IIB tezkor xodimlari tomonidan ushlangan. 

Shahrisabz shahar tibbiyot birlashmasining 29-mart kuni taqdim etilgan maʼlumotnomasida T.A.ning tanasida ogʻir ochiq teshib oʻtuvchi bosh miya jarohati, bosh miya ichidagi metal va suyak parchalari, chap peshona suyagining parchalanib singan jarohati, chap qosh ustida ezilib yirtilgan koʻrinishida tan jarohatlari borligi, ahvoli oʻta ogʻir darajada ekanligi qayd etilgan.

Mazkur holat yuzasidan Shahrisabz tuman prokuraturasi tomonidan fuqaroga nisbatan Jinoyat kodeksining 25,97-moddasi 2-qismi “d” va “l” bandlari (bezorilik oqibatida, boshqa shaxslarning hayoti uchun xavfli boʻlgan usulda qasddan odam oʻldirish) bilan jinoyat ishi qoʻzgʻatilib, Jinoyat protsessual kodeksining 221-moddasi tartibida ushlangan. Tergov harakatlari olib borilmoqda, — deyiladi Bosh prokuratura axborotida.