Qashqadaryoda gaz taʼminoti xodimi fuqaroni urib, jagʻini sindirdi

Qayd etilishicha, voqea kecha, 15 oktabr kuni Qashqadaryo viloyati Koson tumani "Etak" MFYda sodir boʻlgan. Shu mahallada yashovchi fuqaro uyida gaz tez-tez uzilib turgani sabab koʻchasidagi qoʻshnilari bilan mahallaga kelgan hudud gaz taʼminoti masʼul xodimlarining yoniga chiqqan. 

Shu vaqtda xodim va fuqarolar oʻrtasida janjal kelib chiqib, oʻrta yoshlar chamasidagi shaxs gaz taʼminoti xodimi tomonidan kaltaklangan. Soʻng holat tasvirga olingan. Videoda kaltaklangan fuqaroning yerda xushsiz yotganini koʻrish mumkin. 

Dastlabki maʼlumotlarga koʻra, "Etak" mahallasida uch oy mobaynida gazda uzilishlar boʻlgan. Xodim tomonidan fuqaroning kaltaklanishi oqibatida jagʻi singan. 

Ammo viloyat gaz taʼminotining munosabatida yuqoridagi mahalladagi gaz uzishishlari 100 kundan buyon davom etayotgani inkor qilinib, uzilishlar 45-50 kun atrofida kuzatilgani taʼkidlangan. Fuqaroni kaltaklagan xodimga esa mahallaning profilaktika inspektori tomonidan dastlabki surishtiruv ishlari olib borilayotgani bildirilgan.

"Yuqorida qayd etilgan voqea "Hududgaz Qashqadaryo" gaz taʼminoti filiali tomonidan nazoratga olingan va xodimning xatti-harakatlariga nisbatan tegishli tartibda chora koʻriladi. Hozirda "Etak" MFY profilaktika inspektori tomonidan dastlabki surishtiruv ishlari olib borilmoqda. Fuqaroning jarohatiga nisbatan sud tibbiy ekspertizasi tayinlangan", deyiladi munosabatda.