Sizdan ugina, bizdan bugina: AQSh nimaning evaziga Ukrainaga yordam davom etishini aytdi

Trampning soʻzlariga koʻra, agar Ukraina bu shartni qabul qilib, u bilan kafolatli shartnomaga erishsa, tez orada Amerika tomonidan Ukrainaga 300 milliard AQSh dollariga yaqin moliyaviy yordam beriladi. 

Ukraina Prezidenti Vladimir Zelenskiy esa bu taklifga rozilik bildirib, uni adolatli qaror deb baholamoqda.

"Bizning yerimizni himoya qilishda yordam berayotgan, dushmanni oʻzining qurollari, sanksiya paketlari bilan orqaga surishimizda koʻmaklashayotgan hamkorlarimiz bilan minerallar ishlab chiqarishimiz mumkinligini ochiqlaymiz", deydi Ukraina Prezidenti.

Biroq, aslida, bu taklif yaqinda qayta saylangan Amerika Prezidentining tashabbusi emas, balki Ukrainaning oʻzidan chiqqan gʻoya edi. Oktabr oyining oʻrtalarida Vladimir Zelenskiyning Oliy Radaga taqdim etgan "Gʻalaba rejasi"sining toʻrtinchi bandida ayni shu kelishuvga doir soʻz baradi. 

Unda Ukraina strategik sheriklariga mamlakatda mavjud boʻlgan muhim resurslarni birgalikda himoya qilish, birgalikda investitsiya qilish va tegishli iqtisodiy salohiyatdan foydalanish toʻgʻrisida maxsus bitim tuzishni taklif qilgan. 

"Ukrainadagi muhim konlar va mamlakatning energiya hamda oziq-ovqat ishlab chiqarishdagi global salohiyati Rossiya Federatsiyasining ushbu urushdagi asosiy maqsadlaridan biridir. Shu bilan birga bu bizning oʻsish imkoniyatimiz hamdir", deya oʻsha paytda nutq soʻzlagan Ukraina Prezidenti.