Timur Kapadze: "Oʻzbekistonning maqsadi – tarix yaratishda davom etish"

"Albatta, mundial biz uchun tarixiy muvaffaqiyat hisoblanadi. Jahon chempionati futbol olamidagi eng nufuzli turnirdir. Orzumizni roʻyobga chiqarish uchun koʻp yillar davomida tinimsiz mehnat qildik va nihoyat, harakatlarimiz oʻz samarasini berdi. Xalqimiz bundan xursand. Ishonchim komilki, bu muvaffaqiyat nafaqat biz uchun, balki butun mamlakatim uchun katta ilhom manbai boʻlib, oldinga tashlangan ulkan qadamdir. Bunday yutuqlar sportning rivojlanishida muhim ahamiyat kasb etadi. Hozirgi kunda yoshlar futbolga tobora qiziqish bildirmoqda, koʻplab ota-onalar esa farzandlarini futbol maktablariga berishmoqda. Bu juda ruhlantiruvchi holat. Bunday surʼat koʻproq homiylarni jalb qilishga, infratuzilmani yaxshilashga va isteʼdodli futbolchilar safini kengaytirishga yordam beradi.

Ochigʻini aytganda, jamoaga saralash bosqichining oʻrtasida qoʻshilish oson boʻlmadi. Muhit jiddiy edi, oldinda muhim oʻyinlar bor, vaqt esa juda oz edi. Jamoaga tez moslashib, darhol natija koʻrsatishim kerak boʻldi. Avvalgi saralash bosqichlarida maqsad sari yaqin kelgandik, ammo oxirgi lahzalarda omad yuz oʻgirgandi. Biroq bu safar oxirigacha bardoshli boʻldik, yaxshi tayyorgarlik koʻrdik va Jahon chempionatiga yoʻllanmani qoʻlga kiritdik.

Har bir oʻyin oʻziga xos bosimga ega, biroq Abu-Dabidagi uchrashuvning farqi shunda ediki, uning hal qiluvchi ekanligini bilardik. Birgina ochko yetarli boʻlishini anglaganimiz sababli, oʻziga xos tanglik yuzaga keldi. Ammo oʻzimizga ishonib, puxta tayyorgarlik koʻrdik va pirovardida kerakli natijaga erishdik.

Bizda allaqachon mustahkam poydevor mavjud. Biroq oldimizda hali vaqt va bir nechta oʻrtoqlik uchrashuvlari bor. Oʻyinlarda yangi futbolchilarni sinab koʻramiz. Biror oʻyinchi oʻzini koʻrsatsa, albatta, uni tarkibga kiritish masalasini koʻrib chiqamiz. Shu bois, barqarorlikni saqlab qolish bilan birga sogʻlom raqobatni ragʻbatlantirishni maqsad qilganmiz. FIFA kunlaridan toʻliq foydalanib, tayyorgarlik uchun iloji boricha koʻproq oʻrtoqlik uchrashuvlari oʻtkazishni rejalashtirganmiz. Mening fikrimcha, CAFA Millatlar Kubogi ham qimmatli musobaqa hisoblanadi. Bu turnir bizga qisqa vaqt ichida turli jamoalarga qarshi oʻynash imkonini beradi. Shuningdek, u yangi futbolchilarni sinab koʻrish uchun ajoyib imkoniyat. Har qanday uchrashuv va turnir, kichik miqyosda boʻlmasin, tayyorgarligimizda foydali boʻladi.

Oʻzbekiston jahon chempionatida ilk bor ishtirok etadi. Biz uchun hamma narsa yangilik boʻladi. Shunchaki bunday nufuzli musobaqada qatnashish va tajriba orttirishning qiymati yuqori. Biroq har oʻyinga gʻalaba qozonish maqsadida yondashamiz. Guruh bosqichidan oʻtib, imkon qadar uzoqroqqa borishga erishsak, ajoyib boʻlardi. Mundial yangi sahifa va yangi bosqich hisoblanadi. Jahon chempionati juda muhim ahamiyatga ega. 

Top-ligalardagi ishtirok futbolchilarga yuqori darajadagi tajriba orttirish imkonini beradi va ularning bu tajribasini milliy terma jamoada qoʻllashiga zamin yaratadi. Yevropadagi futbol juda raqobatbardosh, shuning uchun futbolchilarimiz u yerda oʻynab, kuchli va yetuk boʻlib bormoqda. Bu esa milliy terma jamoaga katta foyda keltirmoqda", – dedi Kapadze.