Shavkat Mirziyoyev Qirg‘izistonga tashrif buyuradi

Avgust oyida O‘zbekiston prezidenti Shavkat Mirziyoyevning Qirg‘izistonga davlat tashrifi bo‘lib o‘tadi.

Tashrif chog‘ida “Seydiqum” nazorat-o‘tkazish punktini ochish masalasi muhokama qilinadi. Bu haqda Qirg‘iziston Davlat chegara xizmati raisining birinchi o‘rinbosari Mirzamir Sidiqov ma’lum qildi.

Deputat Aybek Oltinbekovning aytishicha, Qirg‘iziston-O‘zbekiston chegarasidagi “Seydiqum”dan boshqa barcha nazorat-o‘tkazish punktlari allaqachon ochilgan. Bu punktning ochilishi Bozorqo‘rg‘on tumani uchun iqtisodiy jihatdan foydali.

Sidiqovga ko‘ra, Qirg‘iziston va O‘zbekiston hukumatlararo komissiyasi faoliyatini davom ettirmoqda. Tomonlar nazorat-o‘tkazish punktlari bo‘yicha kelishuvlarni muhokama qilmoqda. Shu doirada 18-iyun kuni Namanganda uchrashuv bo‘lib o‘tgan.

Deputatning aytishicha, nazorat-o‘tkazish punktlari to‘g‘risidagi bitimga, jumladan, “Seydiqum” nazorat-o‘tkazish punkti bo‘yicha o‘zgartirishlar kiritildi. Avgust oyida O‘zbekiston prezidentining Qirg‘izistonga davlat tashrifi doirasida bu masala imzolash uchun taqdim etiladi.