Yevropa Ittifoqi Eronning Isroilga javob zarbalari berganidan keyin mojaroni yanada kuchaytirmaslikka chaqirdi

"Mintaqada (mojaroning) yanada kuchayishiga yoʻl qoʻymaslik va bundan ham koʻproq qon toʻkilishini oldini olish uchun hamma narsani qilish kerak. Biz hamkorlarimiz bilan vaziyat rivojini diqqat bilan kuzatishda davom etamiz", - dedi Yevropa Kengashi prezidenti Charlz Mishel ijtimoiy tarmoq orqali.

"Barcha tomonlar vaziyatni yanada ogʻirlashtirmasliklari va mintaqada barqarorlikni tiklashga harakat qilishlari kerak", - dedi yakshanba kuni Yevrokomissiya rahbari Ursula fon der Layen.

Yevropa Ittifoqining har ikki yetakchisi Eronning Isroilga hujumini qoraladi.

Yevropa Ittifoqining tashqi ishlar va xavfsizlik siyosati boʻyicha oliy vakili Jozef Borrel ijtimoiy tarmoqlarda “bu misli koʻrilmagan keskinlik” ekanini aytdi va “barcha tomonlarni maksimal darajada vazminlikka” chaqirdi.

J. Borrelning aytishicha, u 16-aprelga YI tashqi ishlar vazirlarining “mintaqadagi vaziyatni pasaytirish va xavfsizlikni taʼminlash uchun” navbatdan tashqari yigʻilishini rejalashtirgan.

Eron va uning ittifoqdosh qurolli guruhlari shanba kuni kechqurun Isroilga muvofiqlashtirilgan raketa va uchuvchisiz samolyotlardan zarbalar berdi.

Eronning BMTdagi doimiy vakolatxonasi mamlakatning Isroilga qarshi harbiy amaliyoti BMT Nizomining oʻzini-oʻzi himoya qilishning qonuniy huquqi haqidagi 51-moddasiga asoslanganini va Isroilning Suriyadagi Eron konsulligiga qilgan qonli hujumiga javoban amalga oshirilganini aytdi.

Soʻnggi voqealar mintaqada jangovar harakatlar yanada kengayishi qoʻrquvini kuchaytirdi, chunki Isroil va HAMAS oʻrtasida Gʻazo sektorida doimiy oʻt ochishni toʻxtatish hali ham qiyin.