Ijtimoiy tarmoqlarda blogerdan Anora Sodiqova foydasiga undirilishi lozim boʻlgan mablagʻ toʻlanmayotgani haqida xabarlar tarqalgan edi. Majburiy ijro byurosi axborot xizmati maʼlum qilishicha, 26 dekabr kuni ijro ishi doirasida belgilangan summa toʻliq undirib berilgan.

Qayd etilishicha, Toshkent shahar sudining ijro varaqasiga asosan, Mirsaid Haydarovdan undiruvchi foydasiga 25 mln soʻm maʼnaviy zarar hamda 5 mln 643 ming 500 soʻm sud xarajatlari undirish belgilangan. Ushbu ijro hujjati joriy yil 19 dekabr kuni Majburiy ijro byurosining Bektemir tuman boʻlimi ish yurituviga kelib tushgan va shu kuniyoq ijro ishi qoʻzgʻatilgan.

Ijro jarayonida qarzdorning mol-mulklariga taqiq qoʻyilgan hamda qarzdorlikni ixtiyoriy ravishda bartaraf etish uchun 10 kunlik muddat berilgan. Shu bilan birga, belgilangan muddatda toʻlov amalga oshirilmasa, majburiy ijro choralari qoʻllanilishi haqida ogohlantirilgan.

MIB maʼlumotiga koʻra, 26 dekabr kuni Mirsaid Haydarov tomonidan jami 30 mln 643 ming 500 soʻm qarzdorlik toʻliq qoplangan. Ushbu mablagʻ undiruvchi Anora Sodiqovaning shaxsiy plastik kartasiga uning roziligi asosida oʻtkazib berilgan.

Ijro hujjati amalda bajarilgani sababli ish yurituv tugatilgan.

Maʼlumki, joriy yil 28 may kuni Fuqarolik ishlari boʻyicha Shayxontohur tumanlararo sudi Anora Sodiqovaning Mirsaid Haydarovga nisbatan shaʼn, qadr-qimmat va ishchanlik obroʻsini himoya qilish haqidagi daʼvo talablarini rad etgan edi. Biroq 21 iyul kuni Fuqarolik ishlari boʻyicha Toshkent shahar sudi apellyatsiya instansiyasi mazkur qarorni bekor qildi.

Apellyatsiya sudi qarori bilan Mirsaid Haydarovga:

25 mln soʻm maʼnaviy zarar toʻlash,
5 mln 643,5 ming soʻm sud xarajatlarini qoplash,
Anora Sodiqovadan ochiq tarzda uzr soʻrash,
haqoratli postlarni oʻchirish majburiyati yuklatilgan edi.

#Anora Sadыkova

Anora Sodiqovaga nisbatan haqorat ishi: bloger Mirsaid Haydarov 25 mln soʻm maʼnaviy zarar toʻladi