Milliy statistika qoʻmitasi maʼlumotlariga koʻra, 2025 yilning birinchi yarmida respublikamizda 47 ming 796 ta kichik tadbirkorlik subʼekti tashkil etilgan.

Savdo sohasi tadbirkorlikda keng tarqalgan yoʻnalishlardan biri hisoblanadi va bunda 17 ming 587 ta kichik tadbirkorlik subʼekti tashkil etilgan. Bunday faoliyat turlari orasida chakana va ulgurji savdo, avtotransport vositalari bilan savdo qilish kabi yoʻnalishlar mavjud.

Qishloq xoʻjaligi va baliqchilik boʻyicha 6 ming 183 ta kichik tadbirkorlik subʼekti tashkil etildi. Bu soha iqtisodiyotda muhim oʻringa ega boʻlib, ayniqsa qishloq joylarda yashovchi aholi uchun asosiy mehnat va daromad manbaidir. Qishloq xoʻjaligida kichik korxonalar asosan issiqxona, chorvachilik, parrandachilik va baliqchilik bilan shugʻullanmoqda.

Sanoat sohasi Oʻzbekistonda izchil rivojlanayotgan strategik sohalardan biri boʻlib, bunda 2025 yilning 1-choragi hisobida 6 ming 189 ta korxona oʻz faoliyatini yuritib kelmoqda. Kichik sanoat subʼektlari asosan qayta ishlash sanoati, hunarmandchilik, toʻqimachilik, oziq-ovqat mahsulotlari ishlab chiqarish kabi yoʻnalishlarda faoliyat yuritmoqda.

Yashash va ovqatlanish boʻyicha xizmatlar sohasida 4 ming 234 ta kichik biznes subʼektining tashkil etilishi oʻz-oʻzidan turizm sohasining rivojlanishi bilan chambarchas bogʻliq. Bu sohada mehmonxonalar, kafelar, restoranlar va boshqa xizmatlar faoliyat yuritmoqda.

Qurilish sohasida 2 ming 680 ta kichik tadbirkorlik subʼektlari tashkil etildi. Taʼmirlash va qurilish ishlariga boʻlgan ehtiyoj va qurilish materiallari ishlab chiqarish va yetkazib berish bu sohadagi yirik loyihalar ishlab chiqilishiga sabab boʻlmoqda.

Raqamli iqtisodiyotga oʻtish bilan birga axborot va aloqa sohasida 1 ming 763 ta kichik biznes subʼekti tashkil etildi. IT va mobil ilovalar yaratishni ragʻbatlantirish doirasida ushbu islohotlar amalga oshirilmoqda.

Oʻzbekistonda eksport sohasining yildan-yilga rivojlanib borayotgani va bunda logistika va yetkazib berish xizmatlariga talab ortib borayotgani ushbu soha tadbirkorlari uchun imkoniyatlar yaratmoqda. Elektron tijoratning kengayishi bu sohaga yangi imkoniyatlar olib keldi. Keltirilgan statistikada 1 ming 512 ta kichik tadbirkorlik subʼektining tashkil etilishi ham sohada olib borilayotgan keng koʻlamli ishlardan darak beradi.

Sogʻliqni saqlash va ijtimoiy xizmat koʻrsatish sohasida 989 ta kichik tadbirkorlik subʼekti tashkil etildi. Shaxsiy klinikalar, stomatologiya xizmatlari kabi yoʻnalishlar aholi orasida talabgir boʻlib, ularni kichik biznes vakillari muvaffaqiyatli rivojlantirmoqda.

Shu kabi boshqa sohalarda ham 6 ming 659 ta kichik tadbirkorlik subʼektlari tashkil etilgan boʻlib, ularga taʼlim, konsalting, sanʼat va madaniyat kabi yoʻnalishlar kiradi.

#Biznes

Oʻzbekistonda yarim yilda nechta tadbirkorlik subʼekti tashkil etildi?