Britaniya va uning hamkor davlatlari maʼlum qilishicha, Rossiya oppozitsiyasi yetakchisi Aleksey Navalniy qamoqda boʻlgan vaqtida zaharlangan.

Britaniya bu holatni Kimyoviy qurollarni taqiqlash tashkilotiga rasman maʼlum qildi hamda Rossiyani Kimyoviy qurollar toʻgʻrisidagi konvensiyani qoʻpol ravishda buzganlikda ayblab, bunday xavfli faoliyatni zudlik bilan toʻxtatishga chaqirdi.

Epibatidin tabiatda faqat Janubiy Amerikadagi zaharli dart-qurtlar (qurbaqalar) terisida uchraydi. Asirlikdagi qurbaqalarda bu modda hosil boʻlmaydi va u Rossiyada tabiiy ravishda mavjud emas. Shu bois, mazkur moddaning Navalniy tanasidan topilishi uning qasddan zaharlanganini koʻrsatadi.

Britaniya tashqi ishlar vaziri Ivett Kuper taʼkidlashicha, Navalniyni Rossiya qamogʻida ushbu turdagi zahar bilan zaharlash imkoniyati, vositasi va sababi faqat Rossiya davlatining oʻzida boʻlgan. Uning soʻzlariga koʻra, Britaniya va Yevropa hamkorlari Rossiyani bu harakatlari uchun javobgarlikka tortishda davom etadi.

Britaniya bu voqeani 2018 yilda Solsberida Skripallarga nisbatan «Novichok» qoʻllanilgani va Ukrainada kimyoviy qurollar ishlatilgani bilan bogʻliq holatlarning davomi deb qaramoqda.

Rasmiy London Rossiyada fuqarolik jamiyati va inson huquqlari himoyachilarini qoʻllab-quvvatlashda hamda adolatli va tinch kelajak yoʻlida harakat qilishda davom etishini bildirgan.

#Navalnыy

Britaniya: Rossiya Navalniyni zaharlab oʻldirgan