Nashrning yozishicha, Isroilning bu harakati 22 oylik hujum natijasida vayron boʻlgan hududidan aholini ommaviy koʻchirishning bir qismidir.

Isroilning Sudan bilan qilayotgan muzokaralaridan xabardor 6 kishi The Associated Pressʼga bu kelishuv haqiqatdan ham olib borayotganligini tasdiqlagan. Biroq muzokaralar hozirda qaysi bosqichda ekanligini aytishmagan. Agar mazkur reja amalga oshsa urush azobini va ocharchilikni boshidan kechirgan odamlarni koʻchirish kerak boʻladi va bu inson huquqlari bilan bogʻliq yangi muammolarni keltirib chiqaradi.

Isroil bosh vaziri Binyamin Netanʼyahu AQSh prezidenti Donald Trampning Gʻazo aholisining katta qismini koʻchirish gʻoyasini, oʻzi "ixtiyoriy migratsiya" deb atayotgan usul orqali amalga oshirmoqchi ekanini aytmoqda. Isroil boshqa Afrika davlatlariga ham xuddi shunday koʻchirish takliflarini bildirgan.

“Menimcha, hatto men bilgan urush qonunlariga koʻra ham, toʻgʻri yoʻl aholining ketishiga ruxsat berish, soʻngra u yerda qolgan dushmanga qarshi bor kuchingiz bilan kurashishdir”, — degan Netanʼyaxu Isroil televideniyesiga bergan intervyusida.

U intervyu davomida falastinliklarni Janubiy Sudanga koʻchirish boʻyicha umuman gapirmagan.

Falastinliklar, inson huquqlarini himoya qiluvchi tashkilotlar va xalqaro hamjamiyatning koʻp qismi bu takliflarni xalqaro huquqni buzib, majburiy koʻchirish rejasi sifatida rad etmoqda.

Janubiy Sudan uchun bunday kelishuv Yaqin Sharqda deyarli raqibsiz harbiy kuchga aylangan Isroil bilan yaqinroq aloqalar oʻrnatishga yordam berishi mumkin. Bu, shuningdek, Gʻazo aholisini koʻchirish gʻoyasini fevral oyida ilgari surgan, ammo soʻnggi oylarda undan voz kechganga oʻxshagan Trampga yaqinlashish imkoniyati hamdir.

Janubiy Sudan Tashqi ishlar vazirligi oʻz bayonotida Isroil bilan falastinliklarni koʻchirish masalasida muzokaralar olib borayotgani haqidagi xabarlarni butunlay asossiz ekanligini maʼlum qildi.

"Bu kabi daʼvolar hech qanday asosga ega emas va Janubiy Sudan Respublikasi hukumatining rasmiy pozitsiyasi yoki siyosatini aks ettirmaydi”, — deyiladi vazirlik bayonotida.

AQSh Davlat departamenti vakili esa xususiy diplomatik suhbatlar haqida izoh berishdan bosh tortmoqda.

#Netanʼyahu

Netanʼyahu Gʻazoliklarni Afrikaga koʻchirmoqchi