Parij shahrida YuNESKO Butunjahon merosi qoʻmitasining 47 sessiyasi oʻtkazildi. Sessiya yigʻilishida Shahrisabz shahrining Butunjahon merosi roʻyxatidagi maqomini saqlab qolish boʻyicha ijobiy qaror qabul qilindi.

Madaniyat va sanʼatni rivojlantirish jamgʻarmasi axborot xizmati OʻzAga maʼlum qilishicha, qoʻmita Oʻzbekistonning ushbu obʼektni asrash boʻyicha saʼy harakatlarini yuqori baholab, YuNESKO Butunjahon merosi markazi hamda IKOMOS (Yodgorliklar va diqqatga sazovor maskanlarni asrash boʻyicha xalqaro kengash) bilan samarali hamkorlik muhimligini alohida qayd etdi.

Kelgusi bosqich sifatida Oʻzbekistonga takroriy nominatsiyani tayyorlash uchun uch yil muddat berildi. Unda Shahrisabzning siyosiy, madaniy va diniy markaz sifatidagi betakror tarixiy rolini aks ettiruvchi temuriylar davri meʼmoriy merosiga alohida urgʻu qaratiladi.

Shaharning tarixiy qismi bufer hudud sifatida belgilanishi rejalashtirilgan, bu uning madaniy qiymatini yanada samarali asrash imkonini beradi. Mazkur qaror xalqaro hamkorlik doirasida olib borilgan tizimli va ochiq muloqotlar natijasi boʻldi.

Anjumanda Oʻzbekiston Madaniyat va sanʼatni rivojlantirish jamgʻarmasi raisi Gayane Umerova boshchiligidagi delegatsiya ishtirok etib, YuNESKO, IKOMOS va barcha xalqaro hamkorlarga bildirilgan ishonch va koʻrsatilgan qoʻllab-quvvatlov uchun minnatdorlik bildirgan.

#UNESCO

Shahrisabzning Butunjahon merosi roʻyxatidagi maqomini saqlab qolish boʻyicha ijobiy qaror qabul qilindi