Pokiston bosh vaziri Shahboz Sharif 27 fevraldagi bayonotida Islomobod “har doim tinchlikka intilganini”, biroq endi mamlakat qurolli kuchlari har qanday tajovuzga qatʼiy qarshi turishini maʼlum qildi.

Pokiston mudofaa vaziri Xoja Osifning aytishicha, hozirda Pokiston va “Tolibon” hukumati oʻrtasida “ochiq urush” ketmoqda, chunki Kobulda portlashlar haqida xabar berilgan va chegara boʻylab janglar davom etmoqda.

Bundan bir necha soat avval “Tolibon” hukumati matbuot kotibi Zabihulloh Mujohid Afgʻonistonning ikki mamlakatni ajratib turuvchi Dyurand chizigʻi boʻylab Pokiston harbiylariga qarshi keng koʻlamli hujum amaliyotlarini olib borayotganini maʼlum qilgan edi.

“Tolibon” oʻz hujumini Pokistonning shu hafta boshida uyushtirgan havo hujumlariga javoban amalga oshirganini aytdi.

Afgʻonistonning sobiq prezidenti Hamid Karzay Pokiston hujumlari fonida mamlakati “har qanday sharoitda oʻz jonajon vatanini toʻla yakdillik bilan himoya qilishini va tajovuzga jasorat ila javob qaytarishini” maʼlum qildi.

“Pokiston oʻzi yaratgan zoʻravonlik va portlashlar muammosidan xalos boʻla olmaydi, aksincha, oʻz siyosatini oʻzgartirishi hamda Afgʻoniston bilan yaxshi qoʻshnichilik, hurmat va madaniy munosabatlar yoʻlini tanlashi zarur”, - deb yozdi u “X” ijtimoiy tarmogʻida.

Bu soʻnggi keskinlashuv mamlakatlarning umumiy chegarasi boʻylab bir necha hafta davom etgan janglar ortidan yuz berdi va har ikki tomon oʻnlab odamlar halok boʻlganini daʼvo qilmoqda.

BMT

BMT Bosh kotibi Antonio Guterrish vaziyatni diqqat bilan kuzatib, zoʻravonlik avj olganidan chuqur xavotir bildirdi.

U har ikki davlatni xalqaro gumanitar huquqqa alohida eʼtibor qaratgan holda xalqaro huquq boʻyicha oʻz majburiyatlariga qatʼiy rioya qilishga chaqirdi.

Shuningdek, Guterrish qarama-qarshiliklar davom etayotgan bir paytda har ikki tomon tinch aholini himoya qilishga ustuvor ahamiyat berishi zarurligini taʼkidladi.

Eron

Oʻz mamlakatini urush girdobiga tashlamaslik uchun Qoʻshma Shtatlar bilan jadal muzokaralar olib borayotgan Eron Tashqi ishlar vaziri Abbos Aroqchi Pokiston va Afgʻonistonni oʻzaro kelishmovchiliklarni muloqot va ahil qoʻshnichilik tamoyillari asosida hal qilishga undadi.

Shuningdek, u muqaddas Ramazon oyi oʻzini tiyish va islom birdamligi uchun muhim fursat ekanini taʼkidladi.

Juma kuni tongda “X” ijtimoiy tarmogʻida eʼlon qilgan postida Aroqchi Eronning ushbu vaziyat yumshashi uchun yordam berishga tayyorligini yana bir bor taʼkidladi.

U oʻz mamlakati Kobul va Islomobod oʻrtasidagi konstruktiv muloqotni yengillashtirish hamda hamkorlikni ragʻbatlantirish uchun har qanday zarur yordamni koʻrsatishga tayyor ekanini maʼlum qildi.

Rossiya

Rossiya urishayotgan tomonlarni zudlik bilan transchegaraviy hujumlarni toʻxtatishga va kelishmovchiliklarni diplomatik yoʻl bilan hal qilishga chaqirdi, deb xabar berdi juma kuni RIA agentligi Tashqi ishlar vazirligiga tayanib. Shuningdek, agar ikki tomon ham rozi boʻlsa, vositachilik qilishni taklif qildi.

Xitoy

Juma kuni Xitoy Tashqi ishlar vazirligi Pekinning Pokiston-Afgʻoniston chegarasidagi vaziyat keskinlashuvidan chuqur xavotirda ekanini maʼlum qildi. “Xitoy oʻz kanallari orqali mojaroga vositachilik qilib kelmoqda”, - dedi Tashqi ishlar vazirligi matbuot kotibi Mao Nin navbatdagi brifingda. Uning qoʻshimcha qilishicha, Xitoy vaziyatni yumshatishda konstruktiv rol oʻynashga tayyor.

Muallif: Isomiddin Jumanazarov

#afgʻoniston

Pokiston va Afgʻoniston mojarosi urushga aylandi