Bu haqda Sudyalar oliy kengashi matbuot xizmati maʼlum qildi.

Maʼlum qilinishicha, Toshkent shahar sudining jinoyat ishlari boʻyicha sudyalari — Odilbek Ilhomjonov, Mirziyod Abidov va Muhtarama Turgʻunova, shuningdek, sud raisi oʻrinbosari, jinoyat ishlari boʻyicha sudlov hayʼati raisi Murodjon Mirzajonov odil sudlovni amalga oshirish chogʻida qonuniylikni buzgani uchun lavozimidan ozod qilingan. Ularning sudyalik vakolatlari muddatidan ilgari tugatilgan.

Sudyalar oliy kengashi maʼlumotiga koʻra, mazkur qaror Akmal Shukurov ishi bilan bogʻliq holda qabul qilingan. Sudyalar «Sudlar toʻgʻrisida»gi qonunning 79-moddasi asosida jazoga tortilgan.

Shuningdek, prezidentning 2025 yil 25 dekabrdagi farmoyishi bilan Murodjon Mirzajonov ham yozma arizasiga binoan lavozimidan ozod etilgan. Uning oʻrniga Farhodjon Gʻaniyev Toshkent shahar sudi raisi oʻrinbosari etib tayinlangan. U bunga qadar Andijon viloyat sudi raisi lavozimida faoliyat yuritgan.

Andijon viloyat sudi raisi oʻrinbosari lavozimiga esa Murodjon Ababakirov tayinlangan.

Akmal Shukurov ishi haqida

Akmal Shukurovga nisbatan qoʻzgʻatilgan jinoyat ishi beshta epizodni oʻz ichiga olgan boʻlib, eng katta jamoatchilik eʼtiborini tortgan holat joriy yil sentabr oyida Yakkasaroy tumanida joylashgan The Tower mehmonxonasi oldida sodir boʻlgan janjal bilan bogʻliq.

Ushbu voqeada jabrlanuvchi Boris Avakyan ogʻir tan jarohati olib, komaga tushgan. Akmal Shukurov voqea joyidan qochib ketgan, keyinchalik Qozogʻistonda qoʻlga olinib, Oʻzbekistonga ekstraditsiya qilingan.

Mirzo Ulugʻbek tuman sudi 2025 yil 24 oktabrda Akmal Shukurovni qasddan badanga ogʻir shikast yetkazish, firibgarlik va bezorilikda aybdor deb topib, 8 yil 1 oy ozodlikdan mahrum qilish jazosini tayinlagan.

Biroq Toshkent shahar sudi apellyatsiya instansiyasi 9 dekabrda ushbu jazoni 4 yil 1 oy ozodlikni cheklashga almashtirib, uni sud zalidan ozod qilgan. Bu qaror jamoatchilikda keskin norozilik uygʻotgan.

Shundan soʻng, prokuratura protesti asosida ish taftish instansiyasida qayta koʻrib chiqilib, Akmal Shukurovga 6 yil ozodlikdan mahrum qilish jazosi tayinlangan va u yana qamoqqa olingan. Bu holatdan keyin apellyatsiya qarorini chiqargan sudyalarga nisbatan xizmat tekshiruvi boshlangan.

#akmal shukurov

Akmal Shukurov ishi: apellyatsiyada qaror chiqargan sudyalar lavozimidan chetlatildi