Mintaqadagi vaziyat tahlili

2026 yil 28 fevralda AQSh va Isroil tomonidan Eron obʼektlariga berilgan ommaviy zarbalardan soʻng Yaqin Sharqdagi vaziyat keskinlashib, xavfli bosqichga yetdi. Tehron «mintaqaviy qasd olish» strategiyasini eʼlon qilib, nafaqat Isroilni, balki arab davlatlarini ham ehtimoliy tajovuzga sherik sifatida ayblay boshladi.

Saudiya Arabistoni: iqtisodiy islohotlar urushdan muhim

Mintaqadagi eng taʼsirli davlatlardan biri boʻlgan Saudiya Arabistoni urushga tortilishdan ehtiyot boʻlmoqda. Qirollik oʻz hududini jang maydoniga aylantirmasdan, mintaqadagi siyosiy yetakchiligini saqlab qolishga harakat qilmoqda.

2026 yil 4 mart kuni AQShning Ar-Riyoddagi elchixonasiga qilingan dron hujumi va diplomatlarning evakuatsiyasidan keyin mamlakatda favqulodda xavfsizlik choralari kuchaytirildi.

Valiahd shahzoda Muhammad ibn Salmon uchun katta urush mamlakatning “Vision 2030” iqtisodiy islohotlar dasturiga jiddiy zarba boʻlishi mumkin. Turizm, texnologiya va megaloyihalarga sarflanayotgan yuzlab milliard dollarlik investitsiyalar raketa zarbalari bilan bir vaqtda amalga oshishi amri mahol.

Shu sababli Ar-Riyod oʻz osmonidan Eronga qarshi hujumlar uchun foydalanishga ruxsat bermagan. Saudiya rahbariyati diplomatik kanallar orqali vaziyatni yumshatishga harakat qilmoqda.

Birlashgan Arab Amirliklari: iqtisodiy model xavf ostida

Birlashgan Arab Amirliklari uchun urush — mamlakatning global biznes va turizm markazi sifatidagi mavqeiga katta tahdid.

2026 yil 1 mart kuni Abu-Dabi oʻz hududiga qilingan zarbalardan soʻng Eron bilan diplomatik munosabatlarni uzdi. Biroq bu qaror toʻlaqonli urushga kirishni anglatmaydi.

Sayyohlar va investorlarning mamlakatni tark etishi Dubay va Abu-Dabining iqtisodiy imijiga jiddiy taʼsir koʻrsatmoqda. Shu sababli Amirliklar AQShga Eronga qarshi hujumlar uchun oʻz hududidagi “Al-Dafra” bazasidan foydalanishni taqiqladi.

Bahrayn: eng xavfli nuqta

Bahrayn Koʻrfaz mintaqasidagi eng zaif pozitsiyaga ega davlat hisoblanadi. Bu yerda AQShning 5-floti joylashgani sababli mamlakat Eron nazarida muhim harbiy nishonga aylangan.

Eron qirgʻoqlariga geografik yaqinlik va aholining katta qismi shialardan iborat ekani vaziyatni yanada murakkablashtirmoqda. Keng koʻlamli mojaro yuzaga kelsa, Bahrayn birinchi boʻlib zarba ostida qolishi mumkin.

Quvayt: tarixiy xotira va xavotir

1990 yilda Iroq bosqinini boshidan kechirgan Quvayt yangi mintaqaviy urushdan qattiq xavfsiramoqda.

Mamlakatda AQShning yirik harbiy bazalari joylashganiga qaramay, rasmiy Quvayt Eronga qarshi hujumlar uchun oʻz hududidan foydalanishni taqiqlagan.

Asosiy xavf — mamlakatning Iroq va Saudiya Arabistoni oʻrtasidagi geosiyosiy buferga aylanib qolishi.

Qatar: iqtisodiy manfaatlar hal qiluvchi omil

Qatar uchun urushga kirish iqtisodiy jihatdan katta yoʻqotishlarga olib kelishi mumkin.

Mamlakat hududida AQShning eng yirik harbiy bazalaridan biri — “Al-Udeyd” joylashgan. Ammo Doha ushbu bazadan Eronga qarshi hujumlar uyushtirishni taqiqlagan.

Bundan tashqari, Qatar Eron bilan dunyodagi eng yirik gaz konlaridan birini birgalikda ishlatadi. Shu sababli harbiy mojaro mamlakat iqtisodiyotiga jiddiy zarar yetkazishi mumkin.

Iordaniya: diplomatik muvozanat

Iordaniya murakkab vaziyatda qolmoqda. Mamlakat oʻz osmonida Eron dronlarini urib tushirishga majbur boʻlsa-da, buni koalitsiyaga qoʻshilish emas, balki «suverenitetni himoya qilish» deb taʼriflamoqda.

Biroq bunday harakatlar Eron tomonidan dushmanga yordam sifatida baholanishi mumkin.

Ummon: vositachilik siyosati inqirozda

Oʻn yillar davomida AQSh va Eron oʻrtasida vositachilik qilib kelgan Ummon uchun bu mojaro tashqi siyosiy muvaffaqiyatsizlikka aylandi.

Eron dronlarining mamlakat infratuzilmasiga hujumlari Ummonning betaraflik siyosatini xavf ostiga qoʻydi.

Misr: iqtisodiy xavf

Misr Eron bilan bevosita chegaraga ega boʻlmasa-da, Fors koʻrfazidagi barqarorlikka kuchli bogʻliq.

Suvaysh kanali orqali oʻtadigan savdo va energiya taʼminotidagi uzilishlar mamlakat iqtisodiyotiga jiddiy taʼsir koʻrsatishi mumkin. Shu sababli Qohira mojaroni diplomatik yoʻl bilan hal qilish tarafdori.

Iroq: nazoratdan chiqishi mumkin boʻlgan maydon

Iroq rasman neytral pozitsiyani egallagan. Biroq mamlakat hududida faoliyat yuritayotgan Eronparast guruhlar AQSh obʼektlariga hujum qilmoqda.

Bu esa Iroqni amalda urush maydoniga aylantirishi mumkin.

Harbiy vaziyat: havo mudofaasi tanqisligi

2026 yil mart oyi boshiga kelib Saudiya Arabistoni va BAAda raketaga qarshi mudofaa tizimlari — Patriot va THAAD raketalari zaxirasi kamayib bormoqda.

Eron arzon dronlar va ballistik raketalarni bir vaqtda ishlatish orqali havo mudofaasi tizimlarini «toʻyintirish» taktikasini qoʻllamoqda. Bu esa qimmat raketa zaxiralarini tez sarflashga olib kelmoqda.

2026 yil mart oyidagi vaziyat arab davlatlarini murakkab tanlov oldida qoldirdi. Koʻplab davlatlar Eronga qarshi ochiq urushga kirishni istamayapti. Aksincha, ular oʻz hududlaridan harbiy operatsiyalar uchun foydalanishga ruxsat bermaslik orqali neytral pozitsiyani saqlab qolishga harakat qilmoqda.

Biroq agar raketa zarbalari neft infratuzilmasi, suvni chuchuklashtirish zavodlari yoki strategik savdo yoʻllariga jiddiy zarar yetkazsa, bu ehtiyotkor siyosat tezda omon qolish urushiga aylanishi mumkin.

Shu bois asosiy savol hali ham ochiq qolmoqda:
arab davlatlari Eronga qarshi urushga kiradimi yoki diplomatiya soʻnggi imkoniyat boʻlib qoladimi?

Muallif: Aziz Soliyev

#arab davlatlari

Arab davlatlari Eronga qarshi urushga kiradimi?