Bu haqda The Insider xabar berdi. Checheniston rahbari Ramzan Qodirov oʻgʻli Axmat Qodirov Checheniston Respublikasi hukumati raisi oʻrinbosari vazifasini bajaruvchi etib tayinlanganini maʼlum qildi.

Shuningdek, Checheniston Respublikasining milliy siyosat, tashqi aloqalar, matbuot va axborot vaziri Axmed Dudayev ham hukumat raisi oʻrinbosari vazifasini bajaruvchi etib tayinlandi.

Ramzan Qodirovning ijtimoiy tarmoqdagi bayonotida aytilishicha, 2026 yil Checheniston hukumati tarkibidagi ayrim kadrlar oʻzgarishi bilan boshlangan. Hukumat raisi Magomed Daudov taqdimiga koʻra, Axmat Qodirov Checheniston Respublikasi hukumati raisi oʻrinbosari — jismoniy tarbiya va sport vaziri vazifasini bajaruvchi etib tayinlangan. Shu bilan birga, Axmed Dudayev hukumat raisi oʻrinbosari — milliy siyosat, tashqi aloqalar, matbuot va axborot vaziri lavozimiga tasdiqlangan.

Axmat Qodirov 2005 yilda tugʻilgan. U 2022 yildan buyon Checheniston rahbari maslahatchisi lavozimida faoliyat yuritib kelgan, shuningdek, Rossiya bolalar va yoshlar harakati — “Birinchi harakat”ning mintaqaviy boʻlimi kengashi raisi boʻlgan.

2023 yil noyabr oyida Axmat Qodirov jismoniy tarbiya, sport va yoshlar siyosati boʻyicha vazirning birinchi oʻrinbosari etib tayinlangan. 2024 yil 17 fevral kuni u Checheniston Respublikasi yoshlar ishlari boʻyicha vaziri lavozimini egallagan. 21 may kuni jismoniy tarbiya va sport vaziri etib tayinlangan, 23 may kuni esa “Axmat” futbol klubi prezidenti boʻlgan.

Shuningdek, Axmat Qodirov Checheniston Respublikasi yoshlar siyosati sohasida xizmat koʻrsatgan xodim faxriy unvoni sohibi hisoblanadi.

#axmat qodirov

Ramzan Qodirovning toʻngʻich oʻgʻli yuqori lavozimga tayinlandi