AQSh qoʻllab-quvvatlayotgan Falastin texnokratlar qoʻmitasi Gʻazo sektorining kelajakdagi boshqaruvi boʻyicha oʻz maqsad va vazifalarini maʼlum qildi. Bu haqda Al Jazeera xabar berdi.

Gʻazo sektorini boshqarish boʻyicha Milliy qoʻmita (NGAC) bosh komissari Ali Shaatning aytishicha, qoʻmita asosan urushdan zarar koʻrgan hududlarda hayotiy muhim xizmatlarni tiklash bilan shugʻullanadi.

Uning soʻzlariga koʻra, xavfsizlikni taʼminlash, elektr energiyasi, suv taʼminoti, sogʻliqni saqlash va taʼlim tizimini qayta ishga tushirish asosiy vazifalar qatoriga kiradi. Shuningdek, tinchlik, adolat va demokratiyaga asoslangan jamiyat qurish maqsad qilingan.

Ali Shaat qoʻmita faoliyati shaffoflik va halollik tamoyillariga asoslanishini, iqtisodiyotni tiklash orqali ishsizlikni kamaytirish rejalashtirilayotganini taʼkidladi.

Maʼlumot uchun, ushbu qoʻmita Donald Tramp tomonidan taklif qilingan Gʻazo boʻyicha 20 bandli tinchlik rejasi doirasida tashkil etilgan. Reja BMT Xavfsizlik Kengashi tomonidan maʼqullangan.

Tramp rejasiga koʻra, Gʻazoni qayta tiklash jarayoni “Tinchlik kengashi” tomonidan nazorat qilinadi. Ushbu kengash tarkibiga AQSh va xalqaro tashkilotlarning yuqori lavozimli vakillari kirgan. Hozircha kengashda falastinliklar va ayollar yoʻq.

Shuningdek, rejada Gʻazo sektorida vaqtinchalik xalqaro boshqaruv joriy etilishi va xalqaro barqarorlashtiruvchi kuchlar joylashtirilishi koʻzda tutilgan. HAMASning kelajakda Gʻazoni boshqarishda ishtirok etishi istisno etilgan.

#boshqaruv

Falastin qoʻmitasi Gʻazoni boshqarish boʻyicha asosiy rejalarini eʼlon qildi