Musobaqa 2026 yil 11 iyundan 19 iyulgacha AQSh, Meksika va Kanadada oʻtkazilishi rejalashtirilgan boʻlsa-da, chiptalarni bekor qilish sabablari sportga emas, balki siyosiy omillarga bogʻliq ekani aytilmoqda.

Soʻnggi kunlarda taxminan 16 800–17 000 nafar muxlis Jahon chempionati oʻyinlari uchun olingan chiptalarini qaytargan. Ular bu qarorni AQShning tashqi siyosati, xususan Venesuela va migrantlarga nisbatan olib borilayotgan siyosatdan norozilik bilan izohlamoqda. Kuzatuvchilar mazkur holatni turnirga bormaslik orqali amalga oshirilayotgan ramziy boykot sifatida baholamoqda.

Muxlislar noroziligining asosiy sabablari sifatida AQShning ayrim xalqaro siyosiy qarorlari, mamlakatdagi xavfsizlik va immigratsiya siyosati, shuningdek, faollar tomonidan ijtimoiy tarmoqlarda tarqatilayotgan boykot chaqiriqlari keltirilmoqda. Ayniqsa, AQSh Migratsiya va bojxona nazorati xizmati (ICE) faoliyati bilan bogʻliq holatlar muxlislar orasida xavotirni kuchaytirgan.

FIFA mazkur vaziyat yuzasidan tashkilot rahbariyati ishtirokida favqulodda yigʻilish oʻtkazishni rejalashtirgan. Unda chiptalarning ommaviy ravishda bekor qilinishi, turnir nufuziga ehtimoliy taʼsirlar hamda muxlislar xavfsizligi masalalari muhokama qilinishi kutilmoqda. Biroq FIFA hozircha rasmiy bayonot bermadi, faqat vaziyatni barqarorlashtirish choralari koʻrib chiqilayotganini maʼlum qildi.

Shu bilan birga, chiptalardan ommaviy voz kechish ikkillamchi bozorga ham taʼsir koʻrsatmoqda. Taklif oshgani sabab chipta narxlari pasaya boshlagan. FIFA qoidalariga koʻra, chiptani osonlikcha qaytarish imkoniyati cheklangani uchun ayrim muxlislar ularni qayta sotuvga chiqarishga majbur boʻlmoqda.

#chipta

AQSh siyosatiga norozilik bildigan 17 mingga yaqin muxlis JCh–2026 chiptalarini bekor qildi